BMW кабриолетининг ўриндиқни иситиш тизими ҳайдовчининг свитерини куйдириб қўйди

Буюк Британияда BMW 6-Series кабриолетининг ҳайдовчи ўриндиғини иситиш тизими нафақат ўриндиқ қопламасини, балки ҳайдовчининг свитерини ҳам куйдириб юборди, деб хабар беради Motor.

Daily Mail нашрининг ёзишича, E64 авлодига кирадиган BMW 650i Convertible’га эгалик қилувчи британиялик Дэвид Марч журналистларга автомобилдаги хавфли нуқсондан шикоят қилган. Унинг таъкидлашича, ҳайдовчи ўриндиғини иситиш тизимининг носозлиги нафақат ўриндиқнинг чарм қопламасини, балки унинг кийимини ҳам куйдириб юборган. Бунга исбот сифатида 2007 йилги қора кабриолет эгаси куйиш оқибатида иккита тешик пайдо бўлган жунли тўқ кўк свитерини кўрсатган. Марчнинг сўзларига кўра, у савдо марказидаги автотураргоҳда машина ичида ўтириб, рафиқасининг дўкондан чиқишини кутган ва бели куяётганини сезиб қолган.

Автомобилдан тушиб қараганида, ҳайдовчи ўриндиғининг ён қисмида ва свитерида тешик пайдо бўлганини кўрган. Марч содир бўлган воқеадан жуда ғазабланган, бироқ маҳаллий дилер мутахассислари ишлаб чиқарилганига 14 йил бўлган ва 145 минг километр йўл босган 650i Convertible’нинг кафолат таъмири ҳақида гап бўлиши ҳам мумкин эмаслигини маълум қилган. Британиялик BMW’дан ушбу ҳолат бўйича машиналарни чақириб олиш кампаниясини ташкиллаштиришни талаб қилмоқда. Бавария компанияси бунга қадар 2003—2004 йилда ишлаб чиқарилган машиналарида ҳам худди шу каби муаммолар кузатилгани сабаб бир неча моделларини қайтариб олган эди.

Эслатиб ўтамиз, 2018 йилда BMW автомобилларга газ чиқиндилари кўрсаткичларини камайтириб кўрсатувчи дастурлар ўрнатганини тан олганди.