RM Sotheby’s аукциони орқали апрель охирида ноёб ва қимматбаҳо лот — афсонавий Bugatti EB110 суперкарининг тўртта оригинал ғилдирак дискалари жамланмаси сотувга қўйилади, деб хабар беради Motor.
Bugatti EB110 суперкарининг тўртта ғилдиракдан иборат ғилдирак дискалари RM Sotheby’s аукциони орқали сотилади. Онлайн савдолар 21 апрель куни бошланиб, 29 апрель куни якунланади. BBS томонидан ишлаб чиқарилган икки компонентли қуйма дискаларни кимошди уйи 8-12 минг еврога сотишни режалаштирган. Аукцион режалаштирган юқори нарх ҳисобга олинадиган бўлса, бу пулга янги Lacetti Gentra харид қилиш мумкин.
Дискалар диаметри 18 дюйм бўлиб, олд қисмининг эни — 9, орқасидаги— 12 дюймни ташкил этади. Лот Копенгагенда жойлашган бўлиб, уни Даниядан олиб келиш учун ҳам яна қўшимча маблағ тўлашга тўғри келади.
1991 йилдан 1995 йилга қадар Bugatti EB110’нинг GТ ва Super Sport версияларидан мос равишда 96 ва 32 нусха ишлаб чиқарилган. Суперкарга 3,5 литрли тўртта турбокомпрессорга эга V12 мотори ўрнатилган. EB110 GT’нинг стандарт модификацияси 560 от кучини тақдим этишга қодир бўлиб, соатига 100 километр тезликка 3,5 сонияда эришади. Максимал тезлиги — 336 километр/соат.
Super Sport версиясига эса 611 от кучига эга мотор ўрнатилган бўлиб, соатига 100 километр тезликка 3,3 сонияда эришади. Максимал тезлиги — 351 километр/соат.
Аввалроқ АҚШда Chevrolet Suburban’нинг пластик «колпаги» янги Mercedes-Benz S-Class нархида сотувга қўйилгани тўғрисида хабар берилганди.
Изоҳ (0)