Ҳиндистоннинг Нагпур шаҳридаги коронавирусга чалинган беморлар даволанаётган шифохонада келиб чиққан ёнғин оқибатида тўрт киши қурбон бўлди. Бу ҳақда Hindustan Times газетасига таяниб, «Korrespondent.net» хабар берди.
Нашр маълумотларига кўра, ёнғин 9 апрель куни тунда, тиббиёт муассасасининг биринчи қаватида бошланган ва тез орада қайта жонлантириш бўлими жойлашган иккинчи қаватга ўтган. Ёнғин содир бўлган пайтда жонлантириш бўлимида 10 нафар бемор бўлган.
Шифохона ходимлари оғир аҳволдаги олти нафар беморни қутқариб қолди, лекин қолган тўрт нафари кислород етишмаслигидан вафот этди.
Умумий ҳисобда ёнғин бўлган бинодан 27 киши эвакуация қилинди ва оғир аҳволда шаҳарнинг бошқа шифохонасига етказилди.
Газетанинг хабар беришича, ёнғин сабаблари ҳозирча номаълум, лекин ҳодисага қисқа туташув сабаб бўлган бўлиши мумкин, деб гумон қилмоқда қутқарувчилар.
Аввалроқ Мумбайдаги Dreams Mall савдо марказида жойлашган коронавирус беморлари даволанаётган Sunrise Hospital шифохонасида содир бўлган ёнғин оқибатида ҳам 10 киши ҳалок бўлган эди. Шифохонадан 76 киши эвакуация қилинган, уларнинг 7 нафари сунъий нафас олдириш аппаратига уланган.
Шунингдек, Бангладешнинг жанубидаги Кокс-Базар шаҳрида жойлашган Балухали рохинжа қочқинлари лагерида катта ёнғин чиқиб, бир неча киши ҳалок бўлди. Таъкидланишича, келиб чиқиши номаълум бўлган ёнғин минглаб уйларни йўқ қилган.
Изоҳ (0)