Ўзбекистонда коронавирусга чалиниш бўйича 2021 йилги кунлик антирекорд янгиланди — бир кунда 207 кишида касаллик тасдиқланди

Ўзбекистонда 8 апрель куни яна 207 кишида коронавирус инфекцияси тасдиқланди. Соғлиқни сақлаш вазирлиги маълумотига кўра, бу 2021 йилдаги янги антирекорддир. Аввалги антирекорд (196) 2 апрель куни қайд этилган эди. Мамлакатда коронавирус инфекцияси қайд этилганлар сони 84 529 нафарни ташкил этмоқда.

Янги касалланиш ҳолатларининг

• 2 нафари Қорақалпоғистон Республикасида,
• 1 нафари Андижон вилоятида,
• 3 нафари Бухоро вилоятида,
• 1 нафари Навоий вилоятида,
• 3 нафари Наманган вилоятида,
• 18 нафари Самарқанд вилоятида,
• 3 нафари Сирдарё вилоятида,
• 3 нафари Сурхондарё вилоятида,
• 2 нафари Фарғона вилоятида,
• 3 нафари Хоразм вилоятида,
• 29 нафари Тошкент вилоятида,
• 139 нафари Тошкент шаҳрида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

ССВнинг қўшимча қилишича, ўтган бир сутка давомида Қорақалпоғистонда 4 киши, Бухорода 6 киши, Жиззахда бир киши, Наманганда 5 киши, Фарғонада 2 киши, Тошкент вилоятида 22 киши, Тошкент шаҳрида эса 141 киши, республика бўйича жами 181 киши COVID-19 касаллигидан соғайган. Соғайиш кўрсаткичи 98 фоизни ташкил этмоқда. Мамлакатда коронавирус асоратлари оқибатида вафот этганлар сони 634 нафарга етди, 8 апрель ҳолатига кўра, коронавирусга қарши эмланганлар сони 83 минг кишидан ошди.

Айни пайтда тиббиёт муассасаларида даволанаётган 1480 нафар бемордан 229 нафари оғир, 104 нафари эса ўта оғир аҳволда.

Аввалроқ Ўзбекистонда март ойидан бошлаб коронавирусга чалиниш ҳолатлари яна кўпая бошлагани муносабати билан бир қатор таълим муассасалари вақтинча ёпилгани ёки таълимни масофавий шаклга ўтказгани тўғрисида хабар берилганди. 1 апрелдан оммавий тадбирларни ўтказишга айрим чекловлар ўрнатилмоқда.