Ангрендаги «Биринчи резинотехника заводи» МЧЖ шина заводи иши бўйича тергов ҳаракатлари бошланди. Бу ҳақда Ҳисоб палатаси раисининг биринчи ўринбосари Баҳодир Туробов ЎзЛиДеП фракцияси йиғилишида маълум қилди.
Партия йиғилишида депутат Дониёр Ғаниев шина заводи лойиҳаси тўлиқ ўйланмагани ва самарасиз фаолият юритаётгани масаласини кўтариб чиққан. Унинг сўзларига кўра, заводнинг кредит тўловлари бўйича 3 миллион доллар миқдорида қарздорлиги мавжуд.
У Ҳисоб палатаси вакилларига мурожаат қилиб, лойиҳа ташаббускорларининг кимлиги ва жавобгар шахслар қонун олдида жавоб бериш-бермаслигини сўраган.
Баҳодир Туробов эса унга жавобан йиғилган материаллар Президент Администрацияси топшириғи билан ҳуқуқни муҳофаза қилиш органларига топширилганини маълум қилган. Унинг қўшимча қилишича, айни пайтда тергов ҳаракатлари олиб борилмоқда, барча эътирозлар вазирлик ва идораларга етказилган.
Аввалроқ Олий Мажлис Қонунчилик палатаси спикер ўринбосари Алишер Қодиров 156,4 миллион долларга барпо этилган завод қувватининг 15 фоизида ишлаётгани, сифати талабга жавоб бермагани учун 100 мингта шина сотилмай қолгани, бу вақт давомида UzAuto Motors 60 млн долларга авторезина импорт қилгани ҳақида хабар берилганди.
Кейинроқ «Ўзкимёсаноат» компанияси изоҳ бериб, паст кўрсаткичлар коронавирус пандемияси билан боғлиқ экани, хом ашё импорти чекланиб, бир неча марта ишлаб чиқариш тўхтаб қолганини ва сотувлар пасайганини маълум қилди.
Изоҳ (0)