Бош прокуратура ҳузуридаги департамент ва ДХХ Андижон вилояти бошқармалари томонидан ўтказилган тезкор тадбир давомида Андижон шаҳар Халқ таълими бўлими бошлиғи 900 доллар пора олаётганида ушланди.
Маълум қилинишича, Андижонда фуқаро бошқа бир фуқаронинг яқин танишларини халқ таълимида аттестациядан ўтказиш, 3 нафар танишини мактаб директори ва директор ўринбосари лавозимларига тайинлаш масаласини ҳал қила олишини айтган.
Фуқаро юқори лавозимда ишловчи танишлари орқали мазкур масалаларни ижобий ҳал қилиб бериши эвазига 8400 долларни олган вақтида ашёвий далиллар билан ушланган.
Эълон қилинган видеолавҳада фуқаро ўз айбига иқрор бўлганини кўриш мумкин. «Қилган ишимдан пушаймонман», — дейди у.
У мазкур пулларнинг бир қисмини Андижон шаҳар Халқ таълими бўлими бошлиғига олиб бориши лозимлигини қўшимча қилган.
Шундан сўнг, ҳуқуқни муҳофаза қилиш органлари ходимлари тезкор тадбирни давом эттирган. Андижон шаҳар Халқ таълими бўлими бошлиғи юқоридаги масалаларни ижобий ҳал қилиш эвазига ундан 900 долларни олганида қўлга олинган.
ХТБ бошлиғига нисбатан Жиноят кодексининг 210-моддаси (пора олиш), фуқарога нисбатан эса 168 (фирибгарлик), 28 (жиноят иштирокчиларининг турлари), 211-моддалари (пора бериш) билан жиноят иши қўзғатилган.
Аввалроқ Бухорода тезроқ кредит олиш учун банк бошқарувчисига 100 доллар пора берган фуқаро жиноят устида қўлга олингани, Самарқандда фуқарони «аёллар дафтари»га киритиш учун 500 доллар талаб қилган маҳалла раисига жиноят иши қўзғатилгани тўғрисида хабар берилганди.
Изоҳ (0)