Индонезияда ўзбек архитектураси услубида қурилган биринчи масжид очилди. Унга Имом ал-Бухорий номи берилди (фото)

Индонезияда ўзбек архитектура услубида қурилган биринчи масжид очилди. Масжидга Имом ал-Бухорий номи берилган. Бу ҳақда Ўзбекистоннинг ушбу мамлакатдаги элчихонасига таяниб, «Подробно» хабар берди.

Масжид 2020 йилнинг мартида Ўзбекистондаги ислом архитектурасини ўрганиш доирасида ташриф буюрган Гунадарма университетининг архитектура факультети профессор ва талабаларининг чизмалари асосида қурилган.

Чет элда Ўзбекистоннинг ижобий имижини, шунингдек, зиёрат ва таълим туризмини тарғиб қилиш бўйича комплекс тадбирлар доирасида Ўзбекистоннинг Жакартадаги элчихонаси Гунадарма университетининг 200 нафар талабасини 2020 йил 4 мартдан 18 мартгача мамлакатга сафарини ташкиллаштирган эди.

Индонезиялик профессор ва талабалар Бухоро, Самарқанд ва Тошкентдаги тарихий архитектурасини ўрганган. Сафар якунига кўра, Ўзбекистондаги тарихий биноларни Индонезияда қуриш усулларини жорий этиш бўйича тавсиявий ҳисобот тайёрланган.

Орадан бир йил ўтгач, коронавирус пандемиясига қарамай, ўзбек архитектурасини ўзида мужассам этган масжид 9 апрель куни — Рамазон ойи бошланишидан аввал фойдаланишга топширилган. Лойиҳа тўлиқ Гунадарма университети томонидан молиялаштирилган.

Ўзбекистон элчихонаси ходимлари янги масжидга Қуръони каримнинг «Усмон Мусҳафи», Ҳазрати Имом ва Имом ал-Бухорий мажмуаларининг деворий суратларини совға қилган.