Ўзбекистонда 2021 йил учун закот, фитр садақа ва фидя миқдори эълон қилинди

Ўзбекистон мусулмонлари идораси Фатво ҳайъатининг 2021 йилги закот нисоби, фитр садақа ва фидя миқдори бўйича қарори эълон қилинди.

Фатво ҳайъати 1 грамм тилланинг бугунги кундаги ўртача нархи 320 000 (уч юз йигирма минг) сўм эканини эътиборга олиб, 2021 йил учун закот нисобини (85 грамм тилладан) 27 200 000 (йигирма етти миллион икки юз минг) сўм деб белгилади. Мазкур қийматнинг қирқдан бири (1/40), яъни закот учун чиқариладиган қисми 680 000 (олти юз саксон минг) сўмга тенг бўлади.

«Шунга кўра, зарур эҳтиёждан ташқари бир йил давомида 27 200 000 сўм ва ундан ортиқ маблағга эга бўлган мусулмон киши жами маблағининг қирқдан бирини ҳисоблаб, уни закот ниятида камбағал ва фақирларга беради», — дейилади қарорда.

Шунингдек, фитр садақасининг миқдори буғдойдан ярим соъ (2 килограмм), арпадан бир соъ (4 килограмм), майиздан ярим соъ (2 килограмм) ва хурмодан бир соъ (4 килограмм) эканлиги таъкидланиб, бугунги кунда мазкур маҳсулотларнинг Тошкент шаҳар бозорларидаги нархлари ўрганилганда 1 килограмм буғдой ўртача 5 минг сўм, 1 килограмм арпа ўртача 3,5 минг сўм, 1 килограмм майиз ўртача 40 минг сўм ва 1 килограмм хурмо ўртача 35 минг сўм экани маълум қилинди.

Шунга кўра, фитр садақасининг миқдори:

• буғдойдан 2 килограмм 10 000 (ўн минг) сўм;
• арпадан 4 килограмм 14 000 (ўн тўрт минг) сўм;
• майиздан 2 килограмм 80 000 (саксон минг) сўм;
• хурмодан 4 килограмм 140 000 (бир юз қирқ минг) сўм деб белгиланди.

Фидя миқдори бир мискиннинг бир кунлик озиқ-овқати қийматида бўлиб, бугунги кунда бу ўртача 25 000 (йигирма беш минг) сўмга тўғри келганидан, бу йилги фидя миқдори бир кун учун 25 000 (йигирма беш минг) сўм, бир ойга 750 000 (етти юз эллик минг) сўм деб белгиланди.

Таъкидланишича, мазкур қийматлар Тошкент шаҳар бозорларидаги нархга асосан белгиланган бўлиб, ҳар бир вилоят ўз бозорларидаги нархга қараб фитр садақасини белгилайди.

Эслатиб ўтамиз, Ўзбекистонда Рамазон ойининг бошланиши 13 апрель этиб белгиланди. Рамазон ойида Ўзбекистондаги 1400 га яқин масжидда Қуръони карим хатм қилиниши маълум қилинган. Масжидларда таровеҳ намозларига қулай шарт-шароитларни яратиш мақсадида 10 апрель куни «Озодалик куни» ўтказилади.