Бош прокуратура ҳузуридаги Иқтисодий жиноятларга қарши курашиш департаментининг Сурхондарё вилоят бошқармаси томонидан вилоят перинатал марказининг бош ҳисобчиси Т.А. ва бошқалар 741 миллион сўмдан ортиқ бюджет маблағларини талон-торож қилингани аниқланди.
Маълум бўлишича, Т.А. ва бошқалар 2019—2020 йиллар ва 2021 йилнинг 3 ойида марказда ишламайдиган 15 нафар фуқароларнинг номига уларнинг хабардорлигисиз банк пластик карталарини очиб, ушбу даврларда уларга ҳисобланган жами 741,4 миллион сўмдан ошиқ иш ҳақларини пластик карталарга тушириб, пулларни шахсий манфаатларига ишлатиб юборган.
Шунингдек, марказнинг бош ҳисобчиси жиноий йўл билан топилган 741,4 миллион сўмнинг келиб чиқиш манбаини яшириш мақсадида ушбу пулларнинг 72 миллион сўмини ўзининг номига Lada XRay автомашинага бошланғич тўлов сифатида ўтказиб, жиноий фаолиятдан олинган даромадларни легаллаштирган.
Мазкур ҳолат юзасидан вилоят перинатал марказнинг бош ҳисобчиси Т.А. ва бошқаларга нисбатан Жиноят кодексининг 167-моддаси 3-қисми «а» банди (жуда кўп миқдорда бюджет маблағларини ўзлаштириш йўли билан талон-торож қилиш) ва 243-моддаси (жиноий фаолиятдан олинган даромадларни легаллаштириш) билан жиноят иши қўзғатилиб, тергов ҳаракатлари олиб борилмоқда.
Аввалроқ Жиззахда мансабдорлар обуна учун ўтказилган 192 миллион пулни талон-торож қилгани, улар орасида туман ХТБ ходими ҳам борлиги, Бухорода бандлик маркази мансабдорлари 134 миллион сўм бюджет маблағларини талон-торож қилгани, фуқаролар номига расмийлаштирилган 215 миллион сўм микроқарзни ўзлаштирган МЧЖ раҳбари ва банк ходимига жиноят иши қўзғатилгани, Фарғонада коммунал тўловлар учун аҳолидан йиғилган 123 миллион сўмни талон-торож қилган шахсларга жиноят иши қўзғатилгани ҳақида хабар берилган эди.
Изоҳ (0)