Indoneziyada o‘zbek arxitektura uslubida qurilgan birinchi masjid ochildi. Masjidga Imom al-Buxoriy nomi berilgan. Bu haqda O‘zbekistonning ushbu mamlakatdagi elchixonasiga tayanib, “Podrobno” xabar berdi.
Masjid 2020-yilning martida O‘zbekistondagi islom arxitekturasini o‘rganish doirasida tashrif buyurgan Gunadarma universitetining arxitektura fakulteti professor va talabalarining chizmalari asosida qurilgan.
Chet elda O‘zbekistonning ijobiy imijini, shuningdek, ziyorat va ta’lim turizmini targ‘ib qilish bo‘yicha kompleks tadbirlar doirasida O‘zbekistonning Jakartadagi elchixonasi Gunadarma universitetining 200 nafar talabasini 2020-yil 4-martdan 18-martgacha mamlakatga safarini tashkillashtirgan edi.
Indoneziyalik professor va talabalar Buxoro, Samarqand va Toshkentdagi tarixiy arxitekturasini o‘rgangan. Safar yakuniga ko‘ra, O‘zbekistondagi tarixiy binolarni Indoneziyada qurish usullarini joriy etish bo‘yicha tavsiyaviy hisobot tayyorlangan.
Oradan bir yil o‘tgach, koronavirus pandemiyasiga qaramay, o‘zbek arxitekturasini o‘zida mujassam etgan masjid 9-aprel kuni — Ramazon oyi boshlanishidan avval foydalanishga topshirilgan. Loyiha to‘liq Gunadarma universiteti tomonidan moliyalashtirilgan.
O‘zbekiston elchixonasi xodimlari yangi masjidga Qur’oni karimning “Usmon Mus’hafi”, Hazrati Imom va Imom al-Buxoriy majmualarining devoriy suratlarini sovg‘a qilgan.
Izoh (0)