Германия президенти Франк-Вальтер Штайнмайер AstraZeneca компаниясининг коронавирусга қарши вакцинасининг биринчи дозасини қабул қилди. Вакцинация Бундесвер (мамлакат Қуролли Кучлари) шифохонасида ўтказилди. Бу ҳақда президент матбуот хизматига тайниб «Интерфакс» хабар берди.
«Мен Германияда ишлаб чиқарилган вакцинага ишонаман. Бугун AstraZeneca компанияси вакцинасининг биринчи дозасини олдим. Вакцинация бу пандемиядан қутулиш йўлидаги ҳал қилувчи қарор ҳисобланади», — деди 65 ёшли Штайнмайер.
Шу билан бирга, у мамлакат аҳолисини бу имкониятдан фойдаланишга ва вакцина олишга чақирди.
Германияда Соғлиқни сақлаш вазирлигининг қарори билан AstraZeneca вакцинаси фақат 60 ёшдан ошганларга тавсия этилган. Тегишли қарор STIKO доимий эмлаш комиссиясининг хулосаси асосида қабул қилинди. Юзага келиши мумкин бўлган эҳтимолий ножўя таъсирлар бунга сабаб бўлди — эмлашдан кейин баъзи беморларнинг қонида тромблар ҳосил бўлиши кузатилди.
Аввалроқ Италия бош вазири Марио Драги, Жанубий Корея президенти Мун Чже Ин, Буюк Британия бош вазири Борис Жонсон, Франция бош вазири Жак Кастекс, Грузия президенти Саломе Зурабишвили ва Таиланд бош вазири Прают Чан-Оча коронавирусга қарши AstraZeneca вакцинаси билан эмлангани ҳақида хабар берилган эди.
Эслатиб ўтамиз, AstraZeneca вакцинаси билан эмланганларнинг қонида тромб пайдо бўлгани ҳақидаги хабарлардан сўнг бир қатор мамлакатлар препаратдан фойдаланишни тўхтатиб қўйганди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган.Лекин Европа дори-дармон агентлиги AstraZeneca вакцинасини хавфсиз деб топди. ЖССТ эса AstraZeneca билан эмлашда давом этишни тавсия қилди.
Изоҳ (0)