Мексиканинг Ничупте оролида яқин орада туғиладиган фарзандининг жинси ҳақидаги маълумот ёзилган улкан баннер билан парвоз қилиши керак бўлган ва байрам учун Xomex компаниясидан ижарага олинган Cessna 206 самолёти кутилмаганда сувга қулади. Бу ҳақда Insider хабар берган.
Ҳалокат тасвирга туширилган видеода меҳмонларнинг ҳозир чақалоқнинг жинси ҳақида маълумот ёзилган баннер пайдо бўлиши ҳақида бақираётгани ва кейинчалик самолётнинг сувга қулаб тушаётгани, ҳодиса оқибатида саросима бошлангани акс этган.
La Prensa Latino нашри берган ахборотга кўра, ҳалокат оқибатида икки нафар одам ҳалок бўлган, уларнинг бири қутқарув операцияси вақтида, яна бири эса биринчи тез тиббий ёрдам кўрсатилаётган пайтда вафот этган. Самолёт бортида жами 4 нафар одам бўлган.
Фуқаро авиациясининг федерал агентлиги кутилмаганда содир бўлган, сирли фожиа юзасидан тергов ҳаракатлари ва ҳалокат сабабларини аниқлаштириш бўйича суриштирув ишларини бошлаб юборган.
2020 йил сентябрь ойида Калифорнияда янги туғиладиган чақалоқ жинсини эълон қилиш мақсадида уюштирилган зиёфат вақтида катта ёнғин содир бўлганди. Ўшанда бўлажак ота-она пиротехника воситаларидан фойдаланиши оқибатида парк ҳудудидаги қуриган майсалар ёниб кетган. Ҳодиса оқибатида 4 минг гектар майдон ёнган, зиёфат оқибатида юзага келган зарарнинг миқдори эса 9 миллион АҚШ долларига баҳоланганди. Ҳодисадан кейин жуфтлик ҳақидаги мем-суратлар ижтимоий тармоқларни портлатган.
Изоҳ (0)