Ўзбекистон Давлат солиқ қўмитаси ўзини ўзи банд қилувчи шахсларга электрон тижоратни амалга ошириш ҳуқуқини беришни таклиф қилмоқда. Бу ҳақда қўмита матбуот хизмати хабар берди.
Идора томонидан Президентининг «Электрон тижорат маъмуриятчилигини такомиллаштириш ва уни янада ривожлантириш учун қулай шароитлар яратиш тўғрисида»ги қарори лойиҳаси ишлаб чиқилган бўлиб, у 7 мартга қадар жамоатчилик муҳокамасига қўйилган эди. Давлат солиқ қўмитаси аҳоли ва тадбиркорлардан келиб тушган таклифларни таҳлил қилган ва таҳлилий ишлар натижасида лойиҳага бир қатор ўзгаришлар ва қўшимчалар киритган.
ДСҚнинг фикрича, ўзини ўзи банд қилувчи шахсларга электрон тижоратни амалга ошириш ҳуқуқини бериш электрон тижорат сегментини «оқартириш»да мутлақо янги имкониятларни яратади.
Лойиҳада электрон тижоратни ривожлантиришга қаратилган бир қатор бошқа рағбатлантириш чоралари ҳам назарда тутилган, хусусан:
- электрон тижорат билан шуғулланадиган барча субъектларнинг айланмадан олинадиган солиқ ва фойда солиғи ставкалари электрон тижоратдан олинган даромад миқдоридан қатъи назар, 50 фоизга пасайтирилади;
- товарлар (хизматлар) электрон савдоси билан шуғулланувчи ёшларга айрим солиқларни фоизсиз кечиктириш (бўлиб-бўлиб тўлаш) ҳуқуқи берилади.
Аввалроқ Ўзбекистонда энди ўзини ўзи банд қилган фуқаролар мобил илова орқали рўйхатдан ўтиб, солиқ тўлаши мумкинлиги, Давлат солиқ қўмитаси раиси ўринбосари Ўзбекистондаги киракашлар нега ўзини ўзи банд қилган фуқаролар рўйхатига киритилмаганига изоҳ бергани ҳамда Ўзбекистонда ишсизлик даражаси пасайгани ҳақида хабар берилганди.
Изоҳ (0)