Тошкент вилояти Бўстонлиқ тумани ҳокимлиги «Амирсой» тоғ-чанғи курортига олиб борувчи автомобиль йўлида содир бўлган кўчки юзасидан қўшимча маълумот берди.
Эслатиб ўтамиз, 25 март куни Тошкент вилоятидаги «Амирсой» сиҳатгоҳига олиб борувчи йўлда чўкиш ҳолати кузатилгани сабаб автомобиллар ҳаракати вақтинча тўхтатилганди.
Маълум қилинишича, 2021 йилнинг февраль ойида Бўстонлиқ туманнинг тоғли ҳудудларида ёғингарчиликлар йиллик меъёрнинг 366 фоизи миқдорида (304 миллиметр), март ойида йиллик меъёрнинг 229 фоизи миқдорида (275 миллиметр) ёғингарчилик ёғиши натижасида мазкур йўлнинг 15—21 пикети оралиқларида йўл қатнов қисмида дастлабки кичик ёриқлар ва чўкишлар пайдо бўла бошлаган.
«2021 йил февраль ойининг биринчи ва иккинчи декадасида ҳарорат бирдан исиб кетиши, қорнинг тез эриши, мавжуд қор уюмлари устига ёмғир ёғиши ва февраль ойининг учинчи декадасида қор ёғиб, ернинг музлаб қолиши оқибатида ёғингарчилик миқдори кўпайиши ҳамда ер ости сувларининг кўтарилиши кўчки ҳодисаларининг фаоллашишига олиб келган», — дейилади хабарда.
Бўстонлиқ тумани хавфли геологик жараёнларни кузатиш станцияси мутахассисларининг олиб борган кузатиш ва ўрганиш ишлари натижаларига кўра, йўлнинг 15—16 пикети ҳамда 19—21 пикети оралиқларида ҳаракатдаги кўчки ёриқларининг узайиш, кенгайиш, чўкиш, силжиш ҳодисалари фаоллашган.
25 март куни мутасадди ташкилотлар мутахассислари томонидан эрталаб ҳаракатдаги кўчкининг визуал ҳажми — 50 000 метр куб, кечга яқин эса тахминан 100 000 метр куб ҳажм атрофида бўлган.
«Амирсой» тоғ-чанғи курортига олиб борувчи автомобиль йўлининг 2—3 пикети оралиқлари йўлнинг четки қисмларида 200 метр куб ҳажмда тупроқ силжиши кузатилган. Шунингдек, йўлнинг 33—34 пикети оралиқларида 600 метр куб тупроқнинг сурилиши ва силжиши оқибатида темир-бетон тўсиқ деворининг қисман шикастлангани кузатилган.
Ҳозирда вазият тўлиқ назорат остига олинган бўлиб, 3-4 кунлик кузатувлар ва ёмғирли кунлардан кейин кўчки ҳудудида лойиҳа асосида йўлни қайта таъмирлаш ишлари олиб борилади. Таъмирлаш ишлари натижаси бўйича қўшимча маълумот берилади.
Аввалроқ Автомобиль йўллари қўмитаси мазкур ҳолатга изоҳ бериб, тоғ ва тоғ олди ҳудудларида бу каби жараёнлар мунтазам содир бўлишини билдирганди.
Изоҳ (0)