O‘zbekiston Davlat soliq qo‘mitasi o‘zini o‘zi band qiluvchi shaxslarga elektron tijoratni amalga oshirish huquqini berishni taklif qilmoqda. Bu haqda qo‘mita matbuot xizmati xabar berdi.
Idora tomonidan Prezidentining “Elektron tijorat ma’muriyatchiligini takomillashtirish va uni yanada rivojlantirish uchun qulay sharoitlar yaratish to‘g‘risida”gi qarori loyihasi ishlab chiqilgan bo‘lib, u 7-martga qadar jamoatchilik muhokamasiga qo‘yilgan edi. Davlat soliq qo‘mitasi aholi va tadbirkorlardan kelib tushgan takliflarni tahlil qilgan va tahliliy ishlar natijasida loyihaga bir qator o‘zgarishlar va qo‘shimchalar kiritgan.
DSQning fikricha, o‘zini o‘zi band qiluvchi shaxslarga elektron tijoratni amalga oshirish huquqini berish elektron tijorat segmentini “oqartirish”da mutlaqo yangi imkoniyatlarni yaratadi.
Loyihada elektron tijoratni rivojlantirishga qaratilgan bir qator boshqa rag‘batlantirish choralari ham nazarda tutilgan, xususan:
- elektron tijorat bilan shug‘ullanadigan barcha subyektlarning aylanmadan olinadigan soliq va foyda solig‘i stavkalari elektron tijoratdan olingan daromad miqdoridan qat’i nazar, 50 foizga pasaytiriladi;
- tovarlar (xizmatlar) elektron savdosi bilan shug‘ullanuvchi yoshlarga ayrim soliqlarni foizsiz kechiktirish (bo‘lib-bo‘lib to‘lash) huquqi beriladi.
Avvalroq O‘zbekistonda endi o‘zini o‘zi band qilgan fuqarolar mobil ilova orqali ro‘yxatdan o‘tib, soliq to‘lashi mumkinligi, Davlat soliq qo‘mitasi raisi o‘rinbosari O‘zbekistondagi kirakashlar nega o‘zini o‘zi band qilgan fuqarolar ro‘yxatiga kiritilmaganiga izoh bergani hamda O‘zbekistonda ishsizlik darajasi pasaygani haqida xabar berilgandi.
Izoh (0)