«Вазият бизни бошқармасин, ҳозир уни биз бошқаряпмиз». Нурмат Отабеков қатъий карантин ҳақидаги саволга жавоб берди

Ҳозир кескин ва жиддий карантин чораларини тиклашга асос бўладиган ҳолат эмас. Бу ҳақда АОКАда ўтган брифингда Коронавирусга қарши кураш штаби аъзоси Нурмат Отабеков маълум қилди.

Биринчидан, ҳурматли юртдошлар, ҳозир айнан ўша кескин жиддий карантин чораларини тиклашга асос бўладиган ҳолат эмас. Шундай бўлса-да, эҳтиёт чораларимизни кўриб қўйишимиз керак. Сўнгги 3 ойда касалланиш паст даражада бўлиб келди, озгина хотиржамликка берилганимиз рост. Эндиликда карантин тадбирларини кучайтирадиган бўлсак, аввалгиларидан фарқ қилади.

Вазиятнинг нечоғлик мураккаблашиб кетиши ўзимизга боғлиқ. Ўтган йилда коронавирусга лабораторик ва клиник ташхис қўйиш, даволаш, тарқалишининг олдини олиш чораларини тўлиқ билмасдик. Ҳозирги кунга келиб, биз дейлик, тиббиёт тизими, ҳам аҳоли коронавирус хавфини яхши тушуниб олди ва ундан ҳимояланиш чораларини ҳам яхши биламиз. Қолаверса, аҳолининг маълум бир қисми ушбу касаллик билан касалланиб ўтди, уларда иммунитет шаклланди.

Нурмат Отабеков, Коронавирусга қарши кураш штаби аъзоси 

Мутахассис эндиликда чора-тадбирлар, талаб этиладиган ҳолатлар ҳамманинг ёдида эканини, қайсидир даражада огоҳлик ва хушёрлик иммунитети шаклланганини айтган. «Вазият бизни бошқармасин, биз ҳозир вазиятни бошқаряпмиз. Имкониятларни ишга солиш орқали уни бошқара олсак, чигаллашиб кетишига йўл қўймаймиз. Энг асосийси вазият бизни бошқаришига йўл қўймаслик керак», — дейди Отабеков.Отабеков касалланишнинг ортиши ҳаддан ортиқ бемалолгарчиликга берилиш, касаллик юқиб қолиши мумкин деган ҳавотирнинг йўқолиши, ниқобда бўлиш, ижтимоий масофа сақлаш, антисептик воситалардан фойдаланиш ва жамоат жойларига зарурат бўлмаса ташриф буюрмаслик каби тавсияларга эътиборсизлик ортиб кетганига боғлиқлигини қайд этди.

Дам олиш ва сайр қилиш истагида хорижий давлатларга бориш, у ерларда эпидемик нохуш ҳудудлардан келган шахслар билан мулоқотда бўлиш COVID-19 инфекцияси республика ҳудудига олиб кирилишига сабаб бўлаётганини айтган.

Эслатиб ўтамиз, 14 март куни Ўзбекистонда декабрдан бери биринчи марта бир кунда 100 дан ортиқ одамда коронавирус аниқланиб, шундан 93 таси Тошкент шаҳрида қайд этилганди. Пойтахтда коронавирусга чалиниш ҳолатлари, асосан, ўқувчилар, талабалар ва ташкилот ходимлари орасида кўпайган. Хусусан, Тошкентдаги 77 та мактабда ўқувчилар орасида коронавирус инфекцияси аниқланган, 117-сонли боғчада икки нафар тарбиячи ва болаларда коронавирус аниқлангани сабаб мазкур боғча вақтинча ёпилди.