Bugun,

  • USD 11095.31
  • RUB 173.84
  • EUR 10772.44

AOKAda bo‘lib o‘tgan brifingda Koronavirusga qarshi kurash shtabi a’zosi Nurmat Otabekov O‘zbekistonda koronavirus bilan kasallanayotgan yangi bemorlarda uning aynan qaysi shtammi kuzatilayotgani haqidagi savolga javob berib o‘tdi.

Foto: “Daryo” / Madina Nurman

Foto: “Daryo” / Madina Nurman
Hozirda bir kunda respublika bo‘yicha 15—18 ming atrofida laboratoriya tekshiruvlari o‘tkazilyapti. Bu har 100 ming aholi soniga, 45—47 ta degani. Albatta, tekshirishlar sonining ortib borishi barobarida kasallikga chalinganlar aniqlanishi darajasining ortib borishi kuzatilishi mumkin. Tekshirishlarni ikki, lozim bo‘lsa uch baravar ko‘paytirish orqali aholi orasida yurgan, kasallikka chalingan shaxslarni faol qidirib topish ishlari amalga oshirilyapti. Bu hozirgi paytda zimmamizdagi asosiy vazifa. Bugungi kunda aniqlanayotgan bemorlarning aksariyat qismida koronavirusning COVID-19 shtammi ekanligi laboratoriya tekshiruvlari natijasida aniqlanmoqda.

Nurmat Otabekov, Koronavirusga qarshi kurash shtabi a’zosi 

Shuningdek, Otabekov kasallanayotganlar orasida bolalarning ko‘pligi yangi shtamm bilan kasallanish holatlarining ko‘payayotganidan dalolat beradimi, degan savolga aniqlik kiritgan. Uning aytishicha, o‘tgan davrdagi statistik ma’lumotlarga ahamiyat berilsa, umumiy kasallanganlarning 2—5, ba’zan 5—7 foiz bolalarga to‘g‘ri kelgan va aksariyat hollarda yengil shaklda kechgan. Hozirga kelib esa bu ko‘rsatkich 25 foizgachani tashkil etmoqda. Bu degani kasallanganlarning to‘rtdan bir qismi bolalardan iborat. “Biz aynan bolalarda chaqirilayotgan kasallikda “Britancha” shtamm ishtiroki borligini inkor qilmaymiz”, — deydi mutaxassis.

Biroq COVID-19’ning “britancha”, “braziliyacha”, “afrikacha” yoki qolgan besh mingga yaqin mutatsiya natijasida yuzaga kelgan yangi koronavirus shtammlariga bog‘liqligidan qat’i nazar tashxis qo‘yish, davolash va profilaktikaga qaratilgan tadbirlarning bir xilligini inobatga olib, epidemiyaga qarshi chora-tadbirlarni izchil ravishda bajarish kerakligi ta’kidlandi.

Eslatib o‘tamiz, avvalroq shtab a’zosi koronavirusga qayd etilish ko‘rsatkichi O‘zbekistonda ham sekin-asta ortib borayotgani, oxirgi 3 oy davomida kasallikning qayd etilish darajasi har yuz ming aholiga 0,2 ko‘rsatkichda bo‘lgan bo‘lsa, oxirgi 3—4 kun mobaynida bu ko‘rsatkich 0,4 ga ko‘tarilganini ma’lum qilgan.

Ma’lumot uchun, 14-mart kuni O‘zbekistonda dekabrdan beri birinchi marta bir kunda 111 kishida, 16-mart kuni esa O‘zbekistonda bir sutka ichida 115 kishida koronavirus aniqlangan edi.

Bundan tashqari, Toshkent shahridagi taksi va qurilish sohasida karantin choralari kuchaytirilishi, poytaxt hokimligi va uning tizimidagi barcha tuzilmalarda turli yig‘ilishlarni o‘tkazish taqiqlangani haqida xabar berilgan edi.

Koronavirus keng tarqalishining oldini olish maqsadida Toshkentdagi ayrim maktablarda o‘qish bosqichma-bosqich masofaviy shaklga o‘tkazilmoqda, bozor va savdo markazlarida karantin talablari kuchaytirildi.

Bundan avval Sirdaryoda so‘nggi ikki kun ichida mingdan ortiq kishi karantin qoidalarini buzgani aniqlangani hamda O‘zbekistonning qator viloyatlarida karantin qoidalarini buzganlarni javobgarlikka tortish holatlari ko‘paygani  haqida xabar berilgandi.

Izoh
Asosiy yangiliklar
Mahalliy
“Daryo” kundaligida 2-dekabrda sodir bo‘lgan eng muhim voqealar
Mahalliy
“Ifloslantiruvchi to‘laydi” tamoyili, “yashil sertifikatlar”, energiya ulushini kamaytirish: Mirziyoyev “yashil” iqtisodiyot taqdimoti bilan tanishdi
Dunyo
Britaniya razvedkasi Rossiya Ukrainadagi urushda quruqlikdan hujum qilolmayotgani sababini tushuntirdi