Фарғонада Наврўз сайлини томоша қилаётган кишининг телефони ва пулларини ўғирлаган икки шахс қўлга олинди. Бу ҳақда Тергов департаменти хабар берди.
Маълум қилинишича, 21 март куни номаълум шахслар Фарғона вилояти Ўзбекистон тумани Яйпан шаҳри марказидаги истироҳат боғида халқ сайлини томоша қилаётган маст ҳолатдаги 31 ёшли А.С.нинг қўлларини орқага қайириб, соғлиги учун хавфли бўлмаган зўрлик ишлатиб, чўнтагидаги 150 минг сўмлик Artel телефон аппарати ва 260 минг сўм пулларини талончилик йўли билан қўлга киритиб, ҳодиса жойидан қочиб кетган.
Олиб борилган терговга қадар текширув ҳаракатлари давомида, ушбу жиноятни 37 ёшли О.А. ва 34 ёшли Б.У. маст ҳолатда содир этгани, ўғирланган пулга спиртли ичимлик сотиб олгани аниқланган. Ўғирланган телефон аппарати эса ашёвий далил тариқасида расмийлаштириб олинган.
Ҳолат юзасидан Ўзбекистон тумани ИИБ ҳузуридаги Тергов бўлими томонидан О.А. ва Б.У.га нисбатан Жиноят кодексининг 166-моддаси (талончилик) 2-қисми «а, в» бандлари билан жиноят иши қўзғатилиб, процессуал тартибда ушланган.
Ҳозирда тергов ҳаракатлари олиб борилмоқда.
Департамент бу турдаги жиноятлар учун Жиноят кодекси нормаларига кўра, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш жазоси тайинланишини эслатиб ўтган.
Аввалроқ Андижонда 21 ёшли аёлнинг сочини зўрлик ишлатиш йўли билан қирқиб ташлаб, телефонини ўмариб кетган йигит ҳибсга олингани, Фарғонада аёл киши ўзганинг уйидан 5000 рубль ва 7 миллион сўмга яқин пулларни ўғирлагани аниқлангани, Самарқандда «романтик оқшом» учун чақирилган қизлар ўсмирнинг уйини тўнаб кетгани ҳамда Тошкентда севган қизига нарса олиб бериш учун телефон ўғирлаган йигит ушлангани ҳақида хабар берилганди.
Изоҳ (0)