Ўзбекистон Қурилиш вазирлиги Навоий вилоятида кўп қаватли турар жой бинолари ва бошқа объектларнинг қурилишида йўл қўйилган қонунбузарликларни аниқлади, деб хабар беради вазирлик матбуот хизмати.
Идора қонунбузарлик билан қурилиш ишларини олиб бораётган олтита компанияни санаб ўтган. Улар орасида Zarafshan Golden Group ҳам бўлиб, компания Зарафшон шаҳридаги 13-кичик туманда шаҳарсозликка рухсат берувчи ҳужжатлар расмийлаштирилмаган ҳамда ҳудудий инспекцияни хабардор этмасдан кўп қаватли турар жой объектида қурилиш-монтаж ишларини бошлаган.
Ушбу ҳолат юзасидан ҳудудий назорат инспекцияси томонидан Ўзбекистон Президенти ҳузуридаги тадбиркорлик субъектларининг ҳуқуқларини ва қонуний манфаатларини ҳимоя қилиш бўйича вакилни хабардор этилган ҳолда қисқа муддатли инспекторлик текшируви ўтказилган. Текширув натижасига кўра масъул фуқарога нисбатан Маъмурий жавобгарлик тўғрисидаги кодекснинг 99-моддаси (шаҳарсозлик тўғрисидаги қонун ҳужжатларини бузиш) 7-қисми билан ўрнатилган тартибда ҳужжатлар йиғилиб, Зарафшон шаҳар Жиноят ишлари бўйича судига юборилган.
Аввалроқ Zarafshon Buldings компанияси бошқа компаниялар билан бир қаторда Тошкент шаҳарида ноқонуний қурилиш ишларини амалга оширгани тўғрисида хабар берилганди. «Gazeta.uz»нинг ёзишича, компаниянинг таъсисчиларидан бири Zarafshan Golden Group ҳисобланади.
Корхоналар ва ташкилотларнинг ягона давлат регистрига кўра, Zarafshan Golden Group (турар жой биноларини қуришга ихтисослашган) таъсисчилари Навоий вилоятидан сайланган сенатор Улуғбек Файзиев Ғаниевич (91,5 фоиз) ҳамда Ойбек Файзиев Ғаниевич (8,4 фоиз) ҳисобланади.
Таъкидланишича, Вазирлар Маҳкамасининг 2020 йил 23 июлдаги қарори билан Zarafshan Golden Group Зарафшондаги 650 ўринга мўлжалланган карантин зонасини қуришнинг тўғридан-тўғри бош пудратчиси этиб тайинланган, буюртмачи — Навоий вилояти ҳокимлиги «Ягона буюртмачи хизмати» инжиниринг компанияси. Объект қурилиши 9,3 миллиард сўмга баҳоланган (ҚҚС билан бирга). Лойиҳа давлат бюджети томонидан молиялаштирилган.
Бундан ташқари, Қурилиш вазирлиги маълумотларига кўра, Навоий вилоятида «Сифат қурилиш Зарафшон», «Зарафшон Биноиншоот қурилиш», «Ҳакимзода», «Осиё Югра» ва «Лайло улгуржи савдо» компаниялари ҳам қонунбузарликка йўл қўйган ҳолда қурилиш ишларини олиб борган.
Zarafshan Golden Group Зарафшон ҳокимининг 2020 йил 28 июлдаги қарори билан компания Навоийдаги 13-кичик туманда шаҳарнинг бош режасига асосан кўп қаватли турар жой биносини қуриш учун 0,525 гектар ҳудудда олганига изоҳ берган.
Қурилиш бош бошқармаси 2020 йил 25 август куни архитектура-режалаштириш топшириғини тасдиқлаган ҳамда газ, электр, сув таъминоти ва канализация тармоқларига уланиш техник шартларни берган. Шунингдек, хатда қайд этилишича, экологик экспертиза хулосаси ҳам олинган.
12 қаватли турар жой биносини қуриш учун Россиянинг «УДС-Инжиниринг» компанияси билан 24 августда имзоланган шартномага биноан мамлакатда биринчи марта темир-бетон конструкциялар асосида лойиҳа-смета ҳужжатлари тайёрланган.
Zarafshan Golden Group’нинг маълум қилишича, объектнинг мослашиши учун маълум бир вақт талаб этилгани, шу сабабли ҳужжатларни расмийлаштириш жараёни чўзилган. Адаптация ишлари «ТошуйжойЛИТИ» компанияси томонидан якунланган.
«Объектда фақат пойдевор ётқизиш учун чуқур қазиш ишлари якунланган ва қурилиш соҳасини назорат қилиш бўйича ҳудудий инспекциянинг кўрсатмаси билан 9 февраль куни лойиҳа-смета ҳужжатлари, давлат экспертизаси ва унинг инспекцияда рўйхатдан ўтказилиши тасдиқлангунга қадар қурилиш ишлари тўхтатилган», — дейилади хабарда.
Аввалроқ Қурилиш вазирлиги Тошкентда бир қатор кўп қаватли турар жой бинолари ноқонуний қурилаётгани аниқланса-да, қурилиш ишлари тўхтатилмаганини, Қашқадарёда қурилиш талабларини бузган бир қанча компанияларга чора кўрилганини маълум қилганди. Самарқандда 2020 йил қурилиш соҳасида 2385 та қонун бузилишига йўл қўйилгани аниқланганди.
Изоҳ (0)