Навоийда профилактика инспектори йўлда тўлғоқ тутган ҳомиладор аёлга кўмаклашди. Бола йўлда туғилди. Ўз вақтида туғруқхонага олиб борилиши натижасида она ва бола ҳаёти сақлаб қолинди. Бу ҳақда «Дарё»га вилоят ИИБ ахборот хизмати раҳбари Ўктам Усмонов хабар берди.
Маълум қилинишича, 21 март куни Хатирчи туманида ўз хизмат вазифасини олиб бораётган профилактика инспектори, лейтенант Бегали Мирзаев соат 23:00 ларда кўчада автомашина тўхтаб турганини кўрган. Автомашина салонида саросимада турган икки аёл борлиги ва улардан бири ҳомиладор бўлиб, айни вақтда унинг тўлғоқ ҳолатидалигини кўрган.
Инспектор зудлик билан бўлажак онага биринчи ёрдам кўрсатишга киришган. Қайнанага тегишли бўлган ушбу автомашина йўлда бузилиб қолгани ва ҳайдаш имконияти йўқлигини билган инспектор зудлик билан яқин орада жойлашган қишлоқ врачлик пунктига борган. Тиббиёт ходимини келтирган ва шу вақт оралиғида ўз қўл телефонидан Хатирчи туман тез тиббий ёрдам бўлимига қўнғироқ қилиб, ҳолатни тушунтирган. Бу пайтда эса тўлғоқдаги аёл фарзандини дунёга келтирган.
Профилактика инспектори эса вақтни бой бермай, аёл ва унинг чақалоғини ўз автомашинасида Хатирчи туман туғруқ бўлимига ўз вақтида етиб боришини таъминлаган.
«Профилактика инспектори бу ҳушёрлиги ва кўмаги билан она ва фарзанднинг тирик қолишига сабабчи бўлган. Хатирчи тумани туғруқхона бўлими навбатчи врачи Салоҳиддин Остонаев ҳамда ёрдамчи ҳамшира Шаҳло Қанотовнинг сўзларига кўра, ҳақиқатан ҳам она ва болага профилактика инспектори ўз вақтида ёрдам кўрсатмаганида уларнинг ҳаётини сақлаш мушкул бўлишини таъкидлади. Ҳозирда уларнинг саломатлиги яхши эканини тиббиёт мутахассислари тасдиқлади», — деди Ўктам Усмонов.
Изоҳ (0)