Буюк Британия бош вазири AstraZeneca вакцинаси билан эмланди

Буюк Британия бош вазири Борис Жонсон AstraZeneca компанияси томонидан ишлаб чиқарилган коронавирусга қарши вакцинасининг биринчи дозасини олди. Ҳукумат раҳбарининг айтишича, у ҳеч қандай оғриқ сезмаган. Бу ҳақда «Korrespondent.net» хабар берди.

«Мутахассисларга қулоқ солинг, Европа Дори-дармон воситалари агентлиги ва Буюк Британиянинг Дори воситалари ва тиббиёт маҳсулотларини назорат қилиш агентлигининг кеча айтган гапларига қулоқ солинг. Ҳақиқий хавф — бу COVID-19, вакцина қилиш эса ҳозир энг яхши фикр», — деди Жонсон баъзи Европа мамлакатларида AstraZeneca билан эмланганларнинг 25 нафарида тромблар ҳосил бўлиши сабабли вакцинациянинг тўхтатилишини назарда тутиб.

Шунингдек, бош вазир британияликларга ҳам мурожаат қилди ва барчани «навбати келиши билан эмланиш»га чақирди.

Маълумот учун, Буюк Британияда эмлаш жараёни сезиларли даражада олдинга силжиган, у ерда вояга етганларнинг деярли ярми вакцина олди. 25 миллион аҳоли вакцинанинг биринчи дозасини қабул қилиб бўлди.

Аввалроқ Таиланд бош вазири Прают Чан-Оча, Грузия президенти Саломе Зурабишвили ва Украина президенти Владимир Зеленский ҳам айнан AstraZeneca вакцинаси билан эмлангани ҳақида хабар берилган эди.

Шунингдек, Италия президенти Сержо Маттарелла Lazzaro Spallanzani номли Рим Миллий юқумли касалликлар институтида коронавирусга қарши эмланди. Ҳиндистон бош вазири Нарендра Моди коронавирусга қарши мамлакатда ишлаб чиқарилган COVAXIN вакцинасининг биринчи дозасини олди. Туркия президенти Ражаб Тоййиб Эрдўғон унга коронавирусга қарши вакцинанинг иккинчи дозаси юборилганини маълум қилди.

Эслатиб ўтамиз, AstraZeneca вакцинаси билан эмланганларнинг қонида тромб пайдо бўлгани ҳақидаги хабарлардан сўнг бир қатор мамлакатлар препаратдан фойдаланишни тўхтатиб қўйганди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган.

Лекин Европа дори-дармон агентлиги AstraZeneca вакцинасини хавфсиз деб топди. ЖССТ эса AstraZeneca билан эмлашда давом этишни тавсия қилди.