Buyuk Britaniya bosh vaziri Boris Jonson AstraZeneca kompaniyasi tomonidan ishlab chiqarilgan koronavirusga qarshi vaksinasining birinchi dozasini oldi. Hukumat rahbarining aytishicha, u hech qanday og‘riq sezmagan. Bu haqda “Korrespondent.net” xabar berdi.
“Mutaxassislarga quloq soling, Yevropa Dori-darmon vositalari agentligi va Buyuk Britaniyaning Dori vositalari va tibbiyot mahsulotlarini nazorat qilish agentligining kecha aytgan gaplariga quloq soling. Haqiqiy xavf — bu COVID-19, vaksina qilish esa hozir eng yaxshi fikr”, — dedi Jonson ba’zi Yevropa mamlakatlarida AstraZeneca bilan emlanganlarning 25 nafarida tromblar hosil bo‘lishi sababli vaksinatsiyaning to‘xtatilishini nazarda tutib.
Shuningdek, bosh vazir britaniyaliklarga ham murojaat qildi va barchani “navbati kelishi bilan emlanish”ga chaqirdi.
Ma’lumot uchun, Buyuk Britaniyada emlash jarayoni sezilarli darajada oldinga siljigan, u yerda voyaga yetganlarning deyarli yarmi vaksina oldi. 25 million aholi vaksinaning birinchi dozasini qabul qilib bo‘ldi.
Avvalroq Tailand bosh vaziri Prayut Chan-Ocha, Gruziya prezidenti Salome Zurabishvili va Ukraina prezidenti Vladimir Zelenskiy ham aynan AstraZeneca vaksinasi bilan emlangani haqida xabar berilgan edi.
Shuningdek, Italiya prezidenti Serjo Mattarella Lazzaro Spallanzani nomli Rim Milliy yuqumli kasalliklar institutida koronavirusga qarshi emlandi. Hindiston bosh vaziri Narendra Modi koronavirusga qarshi mamlakatda ishlab chiqarilgan COVAXIN vaksinasining birinchi dozasini oldi. Turkiya prezidenti Rajab Toyyib Erdo‘g‘on unga koronavirusga qarshi vaksinaning ikkinchi dozasi yuborilganini ma’lum qildi.
Eslatib o‘tamiz, AstraZeneca vaksinasi bilan emlanganlarning qonida tromb paydo bo‘lgani haqidagi xabarlardan so‘ng bir qator mamlakatlar preparatdan foydalanishni to‘xtatib qo‘ygandi. Xususan, Germaniya, Fransiya, Italiya, Ispaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo va Janubiy Afrika mamlakatlarida mazkur vaksinadan foydalanish to‘xtatilgan.
Lekin Yevropa dori-darmon agentligi AstraZeneca vaksinasini xavfsiz deb topdi. JSST esa AstraZeneca bilan emlashda davom etishni tavsiya qildi.
Izoh (0)