Грузия ҳукумати ва мухолифати мамлакатни сиёсий инқироздан чиқариш бўйича келишувга эриша олмади

Тўққиз соатдан ортиқ давом этган музокаралар натижасида Грузия ҳукумати ва мухолифат мамлакатни сиёсий инқироздан чиқариш бўйича келишувга эриша олмади. Бу ҳақда музокараларда воситачилик қилган Европа Кенгаши раҳбариятининг вакили Кристиан Даниэлсон айтиб ўтди, деб ёзади «РБК».

«Музокараларда асосий келишувга эришилмади», — деди Даниэлсон. Унинг қўшимча қилишича, кун тартибидаги баъзи масалалардагина яхшиланиш кузатилмоқда.

Ўз навбатида, ҳукмрон «Грузия орзуси» партиясининг раиси Ираклий Кобахидзе «Келишувнинг амалга ошмагани мухолифат учун айни муддао бўлди», — деди. Парламент спикери Арчил Талаквадзе ҳукмрон партия «мухолифат тайёр бўлиши билан исталган вақтда музокара столига қайтишга» тайёрлигини таъкидлади.

Бироқ оппозиция раҳбарлари «Грузия орзуси»ни музокараларни бузганликда айблади. Уларнинг фикрига кўра, асосий келишмовчилик муддатидан олдинги сайловлар ва сиёсий маҳбусларни озод қилиш масалалари эди, дейилади хабарда.

Рустави 2 телеканалининг хабар беришича, мухолифатдаги «Ягона миллий ҳаракат» партияси аъзоси Акаки Минашвили брифингда мамлакат раҳбарияти билан сиёсий инқироздан чиқиш бўйича келишув амалга ошмагандан сўнг Грузиядаги фуқаролар норозилиги янада катталашишини айтган.

«Ҳеч қандай келишувга эришилмаган иккита асосий масаланинг биринчиси — сиёсий маҳбусларни ҳамда Ника Мелия ва Гиоргия Рурурани озод қилиш, сиёсий таъқибларни тўхтатиш бўлган бўлса, иккинчиси муддатидан олдин сайловлар ўтказиш ҳақида эди», — дейди Минашвили.

Эслатиб ўтамиз, Грузия полицияси 23 февраль куни «Ягона миллий ҳаракат» (ЯМҲ) мухолифат партияси етакчиси Никанор Мелияни ҳибсга олди. У 2019 йилда тартибсизликлар уюштирганликда ва Грузия парламентига қилинган ҳужумда иштирок этганликда айбланган. Ҳибсга олиш операциясида юзлаб полициячилар иштирок этган. Полиция маълумотларига кўра, ЯҲМ идорасига яширинган Мелияни ҳибсга олиш пайтида идора олдига фуқаролар йиғилиб, хавфсизлик кучларига қаршилик кўрсатган. Партия раҳбарини ҳибсга олиш мобайнида полиция кўзни ёшлатувчи газдан фойдаланган. Қўлга олинган мухолифатчи зирҳли машинада олиб кетилган. Шунингдек, асосан, мухолифат тарафдорларидан иборат бўлган 21 киши партия офиси олдида ҳибсга олинган. Улар полициянинг қонуний талабларига бўйсунмасликда айбланган, кейинроқ улар қўйиб юборилган. Сиёсатчи ҳам гаров эвазига озод қилинган.

Шундан сўнг Грузия собиқ президенти Михаил Саакашвили Грузия мухолифатини норозиликларни тўхтатмасликка чақирди.

Маълумот учун, «Ягона миллий ҳаракат» партияси грузиялик сиёсат арбоби Михаил Саакашвили томонидан ташкил этилган. У партияни бошқариш давомида ҳокимиятга эгалик қилиб келган, аммо 2012 йилги парламент сайловларида партия бизнесмен Бидзина Иванишвили томонидан асос солинган «Грузия орзуси» иттифоқига ютқазган. Шундан сўнг ЯҲМ мухолифатга айланди ва Саакашвилининг ўзи мамлакатни тарк этди. Ўшандан бери «Грузия орзуси» ҳокимиятни бошқариб келади.