Хусийлар Saudi Aramco нефть компаниясини ўққа тутгани ҳақида маълум қилди

Яманнинг «Ансар Аллоҳ» (хусийлар) исёнчилар ҳаракатининг расмий вакили, бошқарувчи генерал Яҳё Сария хусийларнинг Саудия Арабистони ҳудудига зарба берганини маълум қилди. Бу ҳақда унинг Алмасираҳ телеканалида келтирилган баёнотига таяниб, «ТАСС» хабар берди.

Генералнинг сўзларига кўра, Saudi Aramco нефть компаниясининг объектлари ўққа тутилган. Таъкидланишича, зарбалар олтита дрон ёрдамида амалга оширилган ва «нишонларга юқори аниқлик билан зарба берилган». Сариянинг қўшимча қилишича, хусийлар «Яманга қарши блокада ва тажовуз давом этар экан, ўзларининг ҳарбий ҳаракатларини давом эттириш ниятидан қайтмайди».

Саудия Арабистони Ар-Риёддаги нефтни қайта ишлаш заводига уюштирилган мазкур ҳужумни тасдиқлади.

«Ар-Риёд яқинидаги Saudi Aramco нефтни қайта ишлаш заводига 19 март, жума куни эрталаб учувчисиз самолётлар ҳужуми уюштирилди ва ёнғин келиб чиқди», — деб хабар берди амирликнинг Энергетика вазирлиги ходимига асосланиб, SPA матбуот агентлиги.

Хабарга кўра, ҳужум оқибатида ҳеч ким қурбон бўлмаган. Шунингдек, ҳодисанинг нефтни қабул қилиш ва нефть маҳсулотларини етказиб бериш ишларига таъсири йўқ. Ёнғин ҳам назоратга олинган, дея қўшимча қилди агентлик.

2020 йилнинг ноябрь ойида ҳам хусийлар Saudi Aramco нефть компаниясига ракета билан ҳужум уюштирган эди. Саудия Арабистонида фаолият олиб борувчи чет эл компаниялари эҳтиёт бўлиши керак, чунки бундай операциялар ҳали давом этади, деган эди хусийлар. Ўша пайтда Саудия Арабистони ракета зарбаси ҳақидаги баёнотни тасдиқламаган.

Исёнчи хусийлар ва Яман президенти Мансур Ҳодий армияси ўртасидаги қуролли можаролар 2014 йилдан бери давом этмоқда. Зиддият 2015 йилнинг мартида мамлакатда Саудия Арабистони бошчилигидаги коалиция кучлари кириб келганидан сўнг кучайган.

Эслатиб ўтамиз, 2020 йилнинг январь ойида хусийлар 2019 йилнинг сентябрида Саудия Арабистонидаги Saudi Aramco нефтни қайта ишлаш объектларига ракета зарбаларини амалга оширганини тан олганди. Натижада мамлакатда нефтни ишлаб чиқариш икки бараварга қисқарган. Бироқ АҚШ бунда Эронни айблаган. Кейинроқ БМТ ҳам Saudi Aramco’га уюштирилган ҳужумга хусийларнинг алоқаси йўқлигини маълум қилганди.