Марказий Осиё минтақасида коронавирус инфекциясининг қайтадан авж олиши туфайли карантин чоралари яна кучайтирила бошланди. Пандемия вазиятини инобатга олган ҳолда минтақада баҳорнинг энг йирик тантанаси — Наврўз умумхалқ байрами тадбирлари чекловлар остида ташкил қилинади, айрим ҳудудларда эса бутунлай бекор қилинади.
Ўзбекистон Соғлиқни сақлаш вазирлигининг маълумотларига кўра, 16 март куни мамлакатда коронавирус билан касалланиш ҳолати сўнгги ойларга нисбатан кескин ортиб, 115 кишида инфекция қайд этилган, шунадан 92 нафари Тошкент шаҳрига тўғри келган.
Мамлакатда Наврўз шарафига бағишланган тадбирлар фақат очиқ жойларда, яъни боғлар, хиёбонлар ва ўйингоҳларда ўтказиш, йиғинларни кичик ҳажмда маҳаллаларда ташкил этиш, ниқоб тақиш ҳамда ижтимоий масофани сақлаш шарти билан ўтказилади.
Шунингдек, инфекциянинг иккинчи тўлқинининг олдини олиш мақсадида Санитария-эпидемиология хизмати томонидан аҳоли ўртасида коронавирус билан касалланиш ҳолатларини барвақт аниқлаш бўйича ПЦР лабораторияларнинг тўлиқ қувватларда фаолиятини ташкил этиш, шунингдек, коронавирус инфекциясига қарши хавфости гуруҳига мансуб аҳоли қатламини ихтиёрий эмлаш тадбирларини ташкил этиш борасида тегишли топшириқлар берилди.
Қирғизистонда эса Соғлиқни сақлаш вазирлиги мамлакатда мунтазам равишда COVID-19 юқтириш ва касаллик оқибатида ўнлаб ўлим ҳолатлари қайд этилаётганини маълум қилди.
Қирғизистон пойтахти Бишкек шаҳар мерияси коронавирус билан касалланиш сони кўпайгани сабабли ҳар йили анъанавий тарзда нишонланадиган Наврўз байрамини бекор қилиш ҳақида қарор қабул қилди.
«COVID-19 коронавирус инфекцияси тарқалишининг олдини олиш мақсадида Бишкек шаҳар мерияси қошидаги шаҳар эпидемияга қарши курашиш фавқулодда комиссияси Бишкек шаҳрида Наврўз байрамига бағишланган оммавий тадбирларни ўтказишни бекор қилиш ҳақида қарор қабул қилди», — деб хабар берди ҳокимлик.
Қозоғистоннинг Нур-Султон ва Олмаота мегаполислари 10 мартдан бошлаб «қизил ҳудуд»га киритилди. Шу муносабат билан Нур-Султонда 21 март, якшанба куни локдаун жорий қилинади. Шу куни савдо марказлари, ёпиқ ноозиқ-овқат бозорлари, ёпиқ спорт объектлари ишламайди. Мамлакатда Наврўз байрамини кенг нишонлаш ва бошқа оммавий тадбирларни ўтказиш тақиқланади. Байрамни дўстлар даврасида ёки хайрия тадбирлари шаклида ташкил этиш тавсия этилади.
«Дунёдаги ва Қозоғистондаги коронавирус инфекцияси билан боғлиқ эпидемиологик муаммоларни ҳисобга олган ҳолда, бу йил Наврўз байрамини имкон қадар онлайн режимда нишонлашни мақсадга мувофиқ деб биламиз. Тадбирлар анъанавий тарзда ўтказилган тақдирда, чеклов чораларига қатъи риоя қилиш талаб этилади», — деди Қозоғистон Санитария-эпидемиология назорати қўмитаси.
Ҳамма сайилга!
Тожикистонда чекловларни кучайтириш ҳақида ҳеч гап йўқ, аксинча улар олиб ташланмоқда. Бу сафар Наврўз байрами 2020 йилги кенг кўламли театрлаштирилган томошаларсиз ўтказилади. Мамлакат президенти Имомали Раҳмон бу билан байрамни ортиқча сарф-харажатларсиз нишонлашга ишора қилди. Бироқ мамлакатда оммавий сайиллар рад этилмаяпти.
Наврўз арафасида пойтахт билан бирга бошқа шаҳарларда ҳам бош майдонларни безатиш, одамлар учун дам олиш ва ҳордиқ чиқариш масканларини ташкил қилиш ишлари бошланган. Майдонларда ўрнатилган байрамона безаклар ва рамзий миллий экспозициялар аллақачон кўплаб аҳоли ва меҳмонларни жалб қилмоқда.
Қайд этиш жоизки, Янги йил арафасида Тожикистон ҳукумати айнан оммавий йиғинлар ва инфекция тарқалиши эҳтимолидан хавфсираб, мамлакатнинг шаҳар ва вилоят майдонларида арчаларни безатишни тақиқлаган эди.
Душанбе, Бохтар ва Хўжандда минглаб одамларни тўплайдиган анъанавий бузқаши, гуштингири кураши, от пойгалари, концерт ва ярмаркалар бўлиб ўтади. Шу билан бирга, Республика штаби коронавирус тарқалишининг олдини олиш бўйича барча қоидалар ва санитария-гигиена меъёрларига риоя қилишни тавсия қилди.
Тарих такрорланадими?
Бундан роппа-роса бир йил муқаддам, айни шу пайтда Тожикистон Наврўзни «қучоқ очиб» кутиб олишга тайёргарлик кўраётганди. Ўша пайтда дунёда ва Ўрта Осиё минтақасида коронавирус пандемияси авж олаётгани ва касалликдан ўлим ҳолатлари кўплаб қайд этилаётганига қарамай, республика байрамни нишонлашдан воз кечмади.
Энг катта Наврўз тантанаси Хўжандда ташкил этилди. 2020 йилнинг 22 март куни »Тожикистон мустақиллигининг 20 йиллиги» стадионида бир неча ойлар давомида байрамга қизғин тайёргарлик кўрган 12 мингга яқин мактаб ўқувчилари ва талабалар иштирокида театрлаштирилган томоша намойиш этилди.
Ўшанда коронавирусдан «холи» Тожикистон ЖССТ тавсияларини эътиборсиз қолдирди, ваҳоланки, ташкилот расмийларга оммавий тадбирлардан тийилишни маслаҳат берган ва тадбирлар халқ саломатлиги учун жиддий оқибатларга олиб келиши мумкинлигини таъкидлаган эди. Аммо бутун мамлакат бўйлаб очиқ осмон остида оммавий сайиллар бўлиб ўтди.
Касалхоналар аста-секин «коронавирус деб топилмаган» беморлар билан тўлдирила бошлаганига қарамай, расмийлар Хитой вируси мамлакатга кирмаганлигини таъкидлашда давом этди.
МДҲ давлатлари орасида Тожикистон (Туркманистондан ташқари) мамлакатда коронавирус борлигини тан олган сўнгги давлат бўлди. Вирусга чалиниш бўйича дастлабки ҳолатлар 2020 йилнинг 30 апрель куни расман эълон қилинди. Ўша куни 15 кишида инфекция аниқланди: 10 нафари Сўғдда, 5 нафари Душанбеда.
Оптимистик статистика
Расмий маълумотларга кўра, пандемия бошланганидан буён Тожикистонда 13 308 та инфекция юқтириш ва 90 та ўлим ҳолати қайд этилган. Ушбу кўрсаткичлар 10 январдан бери ўзгармаган.
Тожикистон коронавирусни мағлуб этгани тўғрисида давлат раҳбари ўзининг январь ойидаги баёнотида маълум қилди. Соғлиқни сақлаш вазири эса бунга карантиндан воз кечиш туфайли эришилганини таъкидлади.
Бугунги кунга келиб, Тожикистонда коронавирус инфекциясининг тарқалиши билан боғлиқ деярли барча чекловлар бекор қилинган, фақат тўйларда меҳмонлар сони чекланган. Кўчаларда ниқоб таққан кишилар деярли учрамайди.
Изоҳ (0)