Хитой делегацияси Анкориж (Аляска)да бўлиб ўтган музокаралар пайтида келишувни бузди. Улар музокарага «жамоатчиликка томоша қўйиш» ниятида келган. Бу ҳақда Вашингтон маъмуриятининг юқори мартабали вакили айтиб ўтди, деб ёзади Politico нашри.
Анкориждаги учрашувда АҚШ томонидан давлат котиби Энтони Блинкен ва президентнинг миллий хавфсизлик бўйича маслаҳатчиси Жейк Салливан, Хитойдан эса Хитой Коммунистик партияси Марказий қўмитаси ташқи ишлар комиссияси идораси раҳбари Ян Сзечи ва ташқи ишлар вазири Ван И иштирок этди.
«Хитой делегацияси, ўз навбатида, масаланинг моҳиятига эмас, балки оммага томоша кўрсатиш ва драматик имо-ишораларга эътибор қаратиб, жамоатчиликнинг кўзи учун иш олиб бориш ниятида келганга ўхшайди», — деди АҚШ маъмурияти вакили.
Унга кўра, ХХР вакиллари нутқ сўзлаш чоғида белгиланган вақтни чўзиш билан келишувни бузган. АҚШ маъмурияти, аслида, ҳар бир юқори мартабали амалдорнинг икки дақиқалик қисқа баёнот сўзлаши ҳақида келишилганини айтди.
Учрашув чоғида Блинкен Хитойнинг Гонконг, Шинжон ва Тайвандаги ҳаракатлари ҳамда АҚШга қарши киберҳужумлар «глобал барқарорликни сақловчи қоидаларга асосланган тартибга таҳдид солишини» айтди.
Ўз навбатида, Ян Сзечи Қўшма Штатларда инсон ҳуқуқлари бузилаётгани ва қора танли америкаликлар «ўлдирилаётгани» ҳақидаги баёнот билан жавоб қайтарди. Шунингдек, у Вашингтон ХХР ишларига аралашмаслиги кераклигини таъкидлади. Шу билан бирга, сиёсатчи қарама-қаршилик ва «совуқ уруш менталитети»дан воз кечишни таклиф қилди.
Аввалроқ Хитой раҳбари Си Цзиньпин Америка президенти Жо Байден билан телефон орқали суҳбат чоғида АҚШ ва Хитой ўртасидаги зиддият бутун дунё учун фалокат бўлишини, шунинг учун икки мамлакат мулоқотни қайта бошлаши кераклигини айтган эди.
Эслатиб ўтамиз, АҚШ Хитойнинг Шинжон-Уйғур мухтор туманидаги уйғурларга нисбатан хатти-ҳаракатларини геноцид ва инсониятга қарши жиноят деб атаган эди. Бу ҳақда АҚШ давлат котиби Майк Помпео ўз ваколатлари тугашидан бир кун олдин эълон қилди. Аввалроқ уйғурлар геноциди ҳақида АҚШнинг сайланган президенти Жо Байден ҳам айтиб ўтган эди. АҚШ Хитойнинг уйғурларга қарши ҳаракатларини геноцид деб атаган биринчи мамлакат бўлди. Оқ уйнинг юқори мансабли вакиллари бошқа мамлакатлар ҳам тез орада АҚШдан ўрнак олишига умид қилмоқда.
Изоҳ (0)