Тожикистон Европанинг ярми рад этган AstraZeneca вакцинасини рад этмаслиги маълум қилинди. Бу ҳақда мамлакат соғлиқни сақлаш вазири ўринбосари Самариддин Ализода вазирликда бўлиб ўтган матбуот анжуманида айтиб ўтди, деб ёзади Asia-Plus.
«Тожикистон AstraZeneca вакцинасини рад этмайди, биз уни мамнуният билан қабул қиламиз», — деди Тожикистон соғлиқни сақлаш вазири ўринбосари Самариддин Ализода.
Соғлиқни сақлаш вазири ўринбосарининг сўзларига кўра, мамлакатда аҳолини коронавирус инфекциясига қарши эмлаш бўйича миллий дастур қабул қилинган. Ушбу дастур доирасида ҳар бир эмланган кишининг аҳволини назорат қилиб бориш кўзда тутилган. Иккиламчи таъсирлар юзасидан барча ҳолатлар кейинги таҳлиллар учун Соғлиқни сақлаш вазирлиги томонидан рўйхатга олинади.
«Биз тайёргарлик кўряпмиз, вакцинация бўйича барча чора-тадбирларни амалга оширмоқдамиз. Шу билан бирга, ушбу вакцина атрофида содир бўлаётган воқеаларнинг ҳеч бирини кўздан қочирмаяпмиз», — вазир ўринбосари.
Эслатиб ўтамиз, COVAX дастури доирасида 8 март куни Ҳиндистондан Душанбега COVID-19’га қарши 192 минг доза Covishield вакцинаси етказиб берилди. Ушбу вакцина Оксфорд-AstraZeneca вакцинаси, аммо Ҳиндистонда ишлаб чиқарилган бўлиб, Covishield коди остида ЖССТ томонидан рўйхатдан ўтган. Ализоданинг сўзларига кўра, COVAX дастури доирасида аҳолининг 20 фоизини эмлаш назарда тутилмоқда. Умуман олганда, Тожикистон ушбу дастур доирасида 624 минг дозада вакцина олади.
Covishield ҳақида гапирар экан, вазир ўринбосари Ҳиндистондаги Серум институти ўзини сифатли вакциналар ишлаб чиқарадиган профессионал институт сифатида намоён қилган, дея таъкидлади.
«Сўнгги йилларда биз полиомиелит (болалардаги фалажлик), қизамиқ ва бошқа касалликларга қарши вакциналарни Ҳиндистоннинг Серум институтидан олиб келмоқдамиз. Бу вақт давомида уларнинг вакциналаридан жиддий иккиламчи таъсирларни кўрмадик. Covishield вакцинаси ишлаб чиқариладиган Ҳиндистоннинг Серум институти Жаҳон соғлиқни сақлаш ташкилотининг сертификатланган клиникасидир», — деди вазир ўринбосари.
Ализода Европа мамлакатлари Европада ишлаб чиқарилган AstraZeneca вакцинасидан фойдаланаётганини, бошқа мамлакатларга эса вакцина Ҳиндистондан етказиб берилаётганини таъкидлаб, асосан, Украина, Молдова ва куни кеча Ўзбекистон ушбу вакцинани қабул қилиб олганини айтди.
Вакцинани республика ҳудудида рўйхатдан ўтказиш тўғрисидаги саволга вазир ўринбосари AstraZeneca аллақачон Тожикистонда рўйхатдан ўтганини айтиб, жавоб берди. Унинг сўзларига кўра, ҳозирда Россиянинг «Спутник V» ва Хитойнинг CoronaVac вакцинасини рўйхатдан ўтказиш ишлари олиб борилмоқда.
Вазир ўринбосарининг сўзларига кўра, айни пайтда Тожикистон бошқа давлатлардан, хусусан, Россия ва Хитойдан вакциналар олиш устида ишламоқда. Бунинг учун Жаҳон банки ва Осиё тараққиёт банки ёрдам бермоқда.
Ализоданинг айтишича, Тожикистон фуқаролари қайси вакцина билан эмланишини ўзлари танлаши мумкин. У вакцинацияни бошлаш санасини ҳали аниқ айтмади, аммо препаратни биринчи навбатда тиббиёт ходимлари қабул қилишини айтди. Уларнинг барчаси мамлакатнинг бошқа фуқаролари сингари вакцинани ихтиёрий ва бепул олади.
Бир кишига икки доза вакцина 8—12 ҳафта оралиғида юборилади. Эмланганидан сўнг фуқароларга Европанинг «яшил паспорти» аналоги бўлган махсус сертификат берилади.
«Шунингдек, хусусий клиникалар ҳам коронавирусга қарши вакцинани сотиб олиши мумкин. Аммо бунинг учун улар препаратни Соғлиқни сақлаш вазирлигида рўйхатдан ўтказиши керак», — деди вазир ўринбосари.
Эслатиб ўтамиз, дунёда AstraZeneca вакцинаси орқали оммавий эмлашлар бошланганидан сўнг вакцинани қабул қилганлар орасида касалхонага ётқизиш ва ўлим ҳолатлари кузатила бошлади. Ўлим ҳолатини ўрганган шифокорлар ушбу дори билан эмланганларда тромблар ҳосил бўлганини аниқлади.
Шундан сўнг бир қатор мамлакатлар препаратдан фойдаланишни тўхтатиб қўйди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган.
ЖССТ AstraZeneca вакцинасидан фойдаланишни тўхтатишга сабаб кўрмаётганини маълум қилди. Кейинроқ AstraZeneca эмлашнинг ножўя таъсири тўғрисидаги хабарларга жавоб берди. Ўзбекистонда эса ушбу вакцинадан фойдаланиш давом этиши маълум қилинди.
Вакцина 17 март куни Тошкент халқаро аэропортига олиб келинди.
Изоҳ (0)