Афғонистонда ҳарбий вертолёт ҳалокатга учради ва ҳукумат ишчилари ўтирган автобус портлади

Афғонистоннинг Вардак вилоятида вертолётнинг қулаб тушиши оқибатида тўққиз киши ҳалок бўлди. Бу ҳақда мамлакат Мудофаа вазирлиги маълумотига асосланиб «РБК» хабар берди

Хабарга кўра, ҳалок бўлганлар орасида тўрт нафар экипаж аъзоси ва беш нафар ҳарбий хизматчи бўлган.

Афғонистоннинг Tolo News агентлигининг хабар беришича, Мудофаа вазирлиги воқеа юзасидан текширув бошлаган. Агентлик манбасининг таъкидлашича, вертолёт махсус кучлар аскарлари ва улар билан бирга озиқ-овқат ҳамда жиҳозларни Бехсуд шаҳрига етказиб бериши керак бўлган. Манбага кўра, вертолёт қўниш пайтида қуролланган одам томонидан уриб туширилган.

Шу билан бирга, Reuters манбаси ва маҳаллий ҳукумат вакили вертолёт парвоз пайтида ракета билан уриб туширилганини айтди.

Москвада 18 март куни афғонистонаро тартибга солиш масалалари бўйича Россия, Хитой, АҚШ ва Покистон махсус вакилларининг учрашуви бўлиб ўтиши режалаштирилган эди. Бу ҳақда 9 март куни Россия ТИВ расмий вакили Мария Захарова маълум қилган. Музокаралар давомида Афғонистондаги можарони тўхтатиш, Доҳадаги жанжал иштирокчилари ўртасида олдиндан музокаралар ўтказиш ва зўравонлик даражасини пасайтириш йўлларини муҳокама қилиш режалаштирилган.

Шунингдек, Tolo News агентилиги Кобулда ичида ҳукумат ходимлари бўлган автобуснинг портлаши натижасида камида тўрт киши ҳалок бўлиб, ўн тўрт киши яралангани ҳақида хабар берди.

Ҳодиса маҳаллий вақт билан эрталаб соат 07:20 да (Тошкент вақти билан соат 07: 50 да) Кобулнинг 17-кварталида содир бўлган. Полиция маълумотларига кўра, автобусда Алоқа ва ахборот технологиялари вазирлиги ходимлари бўлган. Жабрланганлар зудлик билан энг яқин касалхонага етказилган.

تصاویری از انفجار امروز در مربوطات حوزه هفدهم شهر کابل
در این انفجار سه تن کشته شده و ۱۱ تن دیگر زخمی شده‌اند. pic.twitter.com/56s9Sdxg0G

— 1TVNewsAF (@1TVNewsAF) March 18, 2021

Хабарга кўра, ҳеч қайси гуруҳ портлаш учун жавобгарликни ўз зиммасига олмади.

Полиция маълумотларини келтирган 1TV телеканали эса портлаш камида уч кишининг ўлимига сабабчи бўлгани ва 11 кишини жароҳатлагани ҳақида хабар берган.

Tolo News томонидан тўпланган маълумотларга кўра, Афғонистонда сўнгги 18 кун ичида хавфсизлик билан боғлиқ турли ҳодисалар туфайли 144 киши ҳалок бўлган ва 214 киши яраланган.