Туркманистоннинг Тошҳовуз вилоятида 10 март куни COVID-19’га қарши эмлаш бошланди. Биринчи бўлиб тиббиёт ва полиция ходимлари эмланди, дея хабар берди «Хроника Туркменистана».
Ҳудуддаги кўп тармоқли вилоят касалхонаси ва юқумли касалликлар шифохонасидаги аксарият шифокорлар биринчи дозани қабул қилди. Шунингдек, препарат йўл-патруль хизмати полиция ходимлари томонидан қабул қилинди.
Айни пайтда Туркманистонда фақат Россиянинг икки хил вакцинаси — «Спутник V» ва «ЭпиВакКорона» расмий лицензияга эга.
Бироқ газета манбаларига кўра, аҳоли Хитой дори воситаси билан эмланмоқда, вакцинанинг партияси 6 март куни мамлакатга олиб келинган. Айнан қайси вакцинадан фойдаланилганини аниқлашнинг иложи бўлмаган, чунки препаратнинг номи хитойча ҳарфларда ёзилган.
Эмлаш бошланишидан олдин шаҳарда вакцина учун 60 манат тўлаш кераклиги ҳақида миш-миш тарқалди. Аммо биринчи инъекция одамларга бепул берилди, иккинчисининг тўлови ҳақида ҳам хабар берилмади.
Тошҳовуз вилоятининг туманларидаги тиббиёт муассасаларига электрон эмлаш карталарини тайёрлаш буюрилган, унда аҳолининг шахсий маълумотлари ва эмланган санаси кўрсатилиши керак. Бироқ туманларда эмлаш ҳали бошланмаган.
Туркманистонда март ойининг бошидан бери 3 фоиз ҳарбий хизматчилар — армия қўмондонлиги, вазирлик ходимлари, Ашхободда ва унинг атрофида жойлашган ҳарбий қисмларнинг командирлари ва офицерлари эмланди. Улар Россиянинг «Спутник V» вакцинаси билан эмланган.
Аввалроқ Туркманистон аҳолисини коронавирусга қарши эмлашга тайёрланаётгани ҳақида хабар берилганди. Хабарга кўра, эмлашдан олдин одамлар анализ учун қон топширади. Кейин улар билан тушунтириш суҳбати ўтказилади ва биринчи эмлашдан 21 кун ўтгач, иккинчисини олиш кераклиги ҳақида огоҳлантирилади.
Вакцинациядан олдин нега қон олиниши ҳақида маълумот берилмаган. Тахминларга кўра, бу одамларда антитана бирлигини аниқлаш учун. Коронавирусга қарши антитаналарга эга бўлган фуқаро эмланмайди.
Изоҳ (0)