АҚШ президенти Жо Байден Россия президенти Владимир Путин уни таклиф қилган очиқ муҳокамага розилик бериш-бермаслиги ҳақидаги саволни эътиборсиз қолдирди, деб ёзади Meduza. Бундай таклиф Байден Путинни қотил деб атаганидан кейин билдирилган эди.
Оқ уйда АҚШ президентининг коронавирус мавзусидаги нутқидан кейин журналистлардан бири Байденга Путин билан муҳокама ҳақида савол берди. Байден саволга жавоб бермади ва залдан чиқиб кетди.
Аввалроқ Оқ уй матбуот котиби Женнифер Псаки Байден Путинга қарата айтган гапларидан афсусда эмаслигини маълум қилган эди. «У дангал саволга дангал жавоб берди», — деди у. Псаки Байден журналист Жамол Қошиқчининг ўлдирилишига алоқадорликда гумонланаётган Саудия Арабистони валиаҳд шаҳзодаси Муҳаммад ибн Салмонни қотил деб ҳисоблаш-ҳисобламаслиги ҳақидаги саволга жавоб бермади.
Байденга таклиф этилган муҳокама ҳақидаги саволга жавоб берар экан, Псаки икки мамлакат вакиллари аллақачон мулоқот қилганини (у уларнинг январь ойидаги телефон суҳбатини назарда тутган бўлиши керак) айтди. Оқ уй «Россия ҳукумати билан барча даражаларда алоқаларни ушлаб турибди», дея қўшимча қилди у. «Лекин бўлғуси учрашувлар ҳақида ҳеч нарса айта олмайман. Эртага президент Жоржияга кетади ва жуда банд бўлади», — деди Псаки.
Жо Байден 17 март куни журналистнинг «Путинни қотил деб ҳисоблайсизми?», дея берган саволига «Ҳа», дея жавоб қилганди. Ушбу ҳодисадан кейин Россия ўз элчисини масалаҳатлашувлар учун Вашингтондан чақиртириб олди. Россия президентининг матбуот котиби Дмитрий Песков ҳам АҚШ президенти Жо Байденнинг Владимир Путин ҳақидаги баёнотларини «жуда ёмон» деб ҳисоблашини маълум қилган.
18 март куни Путин Байденнинг мазкур баёнотига жавобан унга мустаҳкам соғлиқ тилаган ва «Ким кимнидир ёмонласа, ўша фикрга аслида ўзи муносиб» мазмунидаги болалар учун нақлни келтириб ўтган.
Кейинроқ Путин Байденга тўғридан-тўғри эфир орқали мулоқот қилишни таклиф этди. Буни 19 март, жума ёки 22 март, душанба куни ташкил қилиш мумкинлигини айтди. «Мен у билан тўғридан-тўғри эфирда, онлайн форматда суҳбат қилмоқчиман. Ҳеч қандай танаффусларсиз, очиқ ва тўғридан-тўғри мулоқот қиламиз. Менимча, бу Россия халқи учун ҳам, АҚШ фуқаролари учун ҳам, бошқа давлатларда яшовчи одамлар учун ҳам қизиқ суҳбат бўлади», — деган Путин.
Изоҳ (0)