AQSh prezidenti Jo Bayden Rossiya prezidenti Vladimir Putin uni taklif qilgan ochiq muhokamaga rozilik berish-bermasligi haqidagi savolni e’tiborsiz qoldirdi, deb yozadi Meduza. Bunday taklif Bayden Putinni qotil deb ataganidan keyin bildirilgan edi.
Oq uyda AQSh prezidentining koronavirus mavzusidagi nutqidan keyin jurnalistlardan biri Baydenga Putin bilan muhokama haqida savol berdi. Bayden savolga javob bermadi va zaldan chiqib ketdi.
Avvalroq Oq uy matbuot kotibi Jennifer Psaki Bayden Putinga qarata aytgan gaplaridan afsusda emasligini ma’lum qilgan edi. “U dangal savolga dangal javob berdi”, — dedi u. Psaki Bayden jurnalist Jamol Qoshiqchining o‘ldirilishiga aloqadorlikda gumonlanayotgan Saudiya Arabistoni valiahd shahzodasi Muhammad ibn Salmonni qotil deb hisoblash-hisoblamasligi haqidagi savolga javob bermadi.
Baydenga taklif etilgan muhokama haqidagi savolga javob berar ekan, Psaki ikki mamlakat vakillari allaqachon muloqot qilganini (u ularning yanvar oyidagi telefon suhbatini nazarda tutgan bo‘lishi kerak) aytdi. Oq uy “Rossiya hukumati bilan barcha darajalarda aloqalarni ushlab turibdi”, deya qo‘shimcha qildi u. “Lekin bo‘lg‘usi uchrashuvlar haqida hech narsa ayta olmayman. Ertaga prezident Jorjiyaga ketadi va juda band bo‘ladi”, — dedi Psaki.
Jo Bayden 17-mart kuni jurnalistning “Putinni qotil deb hisoblaysizmi?”, deya bergan savoliga “Ha”, deya javob qilgandi. Ushbu hodisadan keyin Rossiya o‘z elchisini masalahatlashuvlar uchun Vashingtondan chaqirtirib oldi. Rossiya prezidentining matbuot kotibi Dmitriy Peskov ham AQSh prezidenti Jo Baydenning Vladimir Putin haqidagi bayonotlarini “juda yomon” deb hisoblashini ma’lum qilgan.
18-mart kuni Putin Baydenning mazkur bayonotiga javoban unga mustahkam sog‘liq tilagan va “Kim kimnidir yomonlasa, o‘sha fikrga aslida o‘zi munosib” mazmunidagi bolalar uchun naqlni keltirib o‘tgan.
Keyinroq Putin Baydenga to‘g‘ridan to‘g‘ri efir orqali muloqot qilishni taklif etdi. Buni 19-mart, juma yoki 22-mart, dushanba kuni tashkil qilish mumkinligini aytdi. “Men u bilan to‘g‘ridan to‘g‘ri efirda, onlayn formatda suhbat qilmoqchiman. Hech qanday tanaffuslarsiz, ochiq va to‘g‘ridan to‘g‘ri muloqot qilamiz. Menimcha, bu Rossiya xalqi uchun ham, AQSh fuqarolari uchun ham, boshqa davlatlarda yashovchi odamlar uchun ham qiziq suhbat bo‘ladi”, — degan Putin.
Izoh (0)