Меган Маркл ва шаҳзода Гаррининг уйига икки марта бузиб кирилган

Шаҳзода Гарри ва Меган Марклнинг Калифорниядаги дала ҳовлисига айнан бир қонунбузар икки марта Рождество байрамида бузиб кирган. Бу ҳақда Tengrinews хабар берди.

Маълумотларга кўра, 2020 йилнинг 24 декабрь куни биринчи марта полиция ходимлари сарой ҳудудига ноқонуний кириб келганликда гумон қилинган шахсни қўлга олган. Кейин 37 ёшли Николас Брукс огоҳлантириш олган ва қўйиб юборилган. Қонунбузар кейинги уринишни 26 декабрь куни амалга оширган ва шундан кейин ҳибсга олинган.

Ҳозирда унга чегарани бузганлик айблови қўйилмоқда. Хабар берилишича, Брукс бу ишни бажариш учун Огайо штатидан келган. Қонунбузарнинг нега у уйга боргани ва ўғрилик пайтида дала ҳовлида Сассекс герцоги ва герцогиняси бўлган, бўлмагани номаълум.

Шаҳзода Гарри Опра Уинфри билан бўлган суҳбатда сўнгги йилларда у ва унинг оиласи дуч келган хавфсизлик муаммолари ҳақида гаплашгандан сўнг мазкур қонунбузарлик ошкор бўлди. Британия қироллик оиласи интервьюга оид расмий баёнотни эълон қилди. Шунингдек, Буюк Британия қироличаси Елизавета II набираси билан телефон орқали гаплашганидан кейин низони тўхтатиш ниятида.

Маълумот учун, Британия шаҳзодаси Гарри ва унинг рафиқаси Меган Марклнинг америкалик телебошловчи Опра Уинфри билан интервьюси бўлиб ўтди. Икки соатлик суҳбат 7 март куни Америка вақти билан соат 20:00 да CBS телеканалида намойиш этилди. Меган Маркл ва шаҳзода Гарри билан бўлган интервью эфирга чиқарилишидан бир неча соат олдин The Times нашри манбаларига асосланиб Букингем саройи томонидан ушбу интервьюга қирол оиласига нисбатан «уруш эълон қилиш» сифатида қаралишини ёзди.

2020 йил январь ойида Буюк Британия қироличаси Елизавета II нинг набираси, шаҳзода Гарри ва унинг рафиқаси Меган Маркл қироллик оиласининг юқори мартабали аъзолари мақоми ва у билан боғлиқ имтиёзлардан воз кечишини эълон қилган.