Буюк Британия бош вазири Борис Жонсон томонидан 16 март куни расман бошланадиган хавфсизлик, мудофаа ва ташқи сиёсатни ҳар томонлама қайта кўриб чиқишда Россия «душман давлат», Хитой эса «тижорий рақиб» деб аталади. Бу ҳақда The Times газетаси хабар берди.
Газетанинг ёзишича, қайта кўриб чиқишда Россияга «давлат даражасидаги энг катта таҳдид» деб қаралади. Бу Россиянинг Буюк Британия сув ва ҳаво ҳудудига қарши «тез-тез тажовузкор ҳужумлари» ҳамда Москванинг «Британия тупроғида ўз рақибларини ўлдиришга» тайёрлиги билан боғлиқ.
«Британияга асосий таҳдид Россиядан келса, Хитой интеллектуал мулкни ўғирлашга уринадиган ва иқтисодий хавфсизликка таҳдид соладиган рақиб ҳисобланади Аммо бу билан Солсберидаги воқеалар назарда тутилмаяпти», — деди Британия ҳукумати манбаси The Times газетасига Сергей ва Юлия Скрипалларнинг заҳарланишига ишора қилиб.
Ҳукуматнинг бошқа бир манбасига кўра, «Россия — душман давлат, Хитой — глобал муаммо». «Хитойга нисбатан ёндашув қуйидагича бўлиши лозим: керак бўлганда рақобатлашиш, иложи бўлса, ҳамкорлик қилиш, керак бўлганда қаршилик кўрсатиш», — дейди манба The Times газетасига.
Борис Жонсоннинг партияси аъзоси, қуйи палатанинг ташқи ишлар бўйича қўмита раҳбари Том Тугендхат Daily Mail билан суҳбатда ҳукуматнинг Хитойга бўлган муносабатини танқид қилди: «Ўнлаб йиллар давомида Россиянинг қудрати ўғирлик ва ўз фуқароларига нисбатан шафқатсизлик туфайли заифлашди, Хитойнинг қудрати эса фақат ўсди. Рақобат ҳалолликка асосланган бўлади. Бугун биз буни Хитойда кўрмаяпмиз». Тугендхатнинг Хитойга нисбатан позициясини Буюк Британия Миллий киберхавфсизлик марказининг собиқ раҳбари Кяран Мартин қўллаб-қувватлади, деб ёзади The Times.
Хавфсизлик, мудофаа ва ташқи сиёсатни кенг қамровли қайта кўриб чиқишда Буюк Британиянинг Москва ва Пекинга қарши киберфазодаги ҳужум имкониятлари учун харажатларни ошириш режалаштирилмоқда.
Аввалроқ Россия ва Хитой Ой станциясини қуришда ҳамкорлик қилишга келишиб олгани ҳақида хабар берилганди. АҚШ эса Россия ва Хитойнинг коинотдаги имкониятлари юзасидан хавотир билдирган.
Изоҳ (0)