Сўнгги ўн йилликлар давомида Америка президентлари мамлакат инфратузилмасини ривожлантириш учун бюджетдан зарур миқдордаги маблағни ажрата олмагани сабабли инфратузилма ҳозир хавфли ва ачинарли аҳволга тушган. Бу ҳақда The Washington Post газетасига таяниб «ТАСС» хабар берди.
Маълум қилинишича, сўнгги йилларда на республикачилар, на демократлар Оқ уй ва Конгрессни бошқариш пайтида, хусусан, аэропортлар, кенг полосали тармоқлар, транспорт тизимлари, электр узатиш линиялари, портлар ва канализация каналларини таъмирлаш ва ободонлаштириш учун зарур миқдорда маблағ сарфламаган.
Газетанинг таъкидлашича, мамлакатнинг кўплаб шаҳарларида «сув таъминоти тизими ҳар икки дақиқада бузилади, умумий фойдаланиладиган йўлларнинг ярми эса ачинарли ёки хароб ҳолатда». Мутахассисларнинг фикрига кўра, ижро ҳокимияти бу вақт давомида давлат инфратузилмасини ривожлантириш бўйича ҳатто самарали режага ҳам эга бўлмаган.
The Washington Post газетасининг ёзишича, Қўшма Штатларда «илм-фан, тиббиёт ва технологиялар соҳасидаги тарихий ютуқларига чамбарчас ва хавфли равишда инфратузилма, соғлиқни сақлаш ва аҳолининг асосий эҳтиёжларидан тенг ҳуқуқли фойдаланиш масалаларидаги улкан муваффақиятсизликлар ҳам мавжуд».
Эслатиб ўтамиз, 2017 йилнинг март ойида АҚШнинг ўша пайтдаги президенти Дональд Трамп мамлакат инфратузилмасини қайта тиклаш учун Конгрессдан 1 трлн доллар сўраган эди.
Трампнинг таъкидлашича, АҚШ илгарилари хорижда ҳарбий ҳаракатлар олиб боришга анча кўп маблағ сарфлаган. Уларнинг барчаси миллий аҳамиятга эга объектларни қўллаб-қувватлашга сарфланиши мумкин эди. «Бу ердаги инфратузилма вайрон бўлаётган бир пайтда Америка Яқин Шарқда тахминан 6 триллион долларни харж қилди», — деган эди собиқ президент.
Изоҳ (0)