Илон Маскнинг бойлиги бир кун ичида рекорд даражада — 25 млрд долларга кўпайди

SpaceX ва Tesla компаниялари асосчиси бир кунда рекорд даражада — 25,1 миллиард долларга бойиди. Бу ҳақда Bloomberg хабар берди.

Шундан кейин тадбиркорнинг бойлиги 174 миллиард долларни ташкил қилди. Агентлик маълумотларига кўра, Маск дунёнинг энг бой одамлари рўйхатида иккинчи поғонани эгаллаб турибди. Унинг бойлиги Amazon асосчиси Жефф Безосникидан 6 миллиард долларга камроқ (Bloomberg’нинг сўнгги маълумотларига кўра, Безоснинг бойлиги 180 миллиард долларни ташкил этади).

Маск ва Безос йил бошидан буён дунёнинг энг бой одамлари рейтингида бир-бири билан етакчиликни алмашиб келяпти. 7 январь куни Маск биринчи марта 188,5 миллиард доллар билан рўйхатда етакчилик қилди. Бунгача у бу рўйхатнинг биринчи элликталигидаги охирги поғонада турар эди.

Bloomberg’нинг ёзишича, 9 март куни технологик сектор компанияларининг акциялари нархи уч ҳафталик тушишдан кейин яна қайта қимматлади. Бунинг натижасида Безос 6 миллиард доллар ишлаб, ўз бойлигини 180 миллиард долларга кўтариб олди.

Шунингдек, Tesla акциялари деярли 20 фоизга қимматлашиб, 3 февралдан буён эришилган энг яхши натижага айланди. Бошқа омиллар қатори, акциялар қимматлашига New Street Research таҳлилчиси Пьер Феррагунинг Tesla’ни «сотиб олиш» бўйича тавсияси, шунингдек, мақсадли акциялар нархининг кўтарилгани таъсир кўрсатди.

Февраль ойининг охирида Tesla акциялари сентябрдан буён биринчи марта 8,6 фоизга тушиб кетган эди. Натижада Маск рейтингдаги етакчиликни Безосга бўшатиб берди.