Британия қироллик оиласи Меган Марклнинг ирқчилик масаласи ҳақидаги баёнотини ўрганиб чиқишга ваъда берди

Қиролича Елизавета II ва унинг оила аъзолари, шаҳзода Гарри ва унинг рафиқаси Меган Марклнинг америкалик телебошловчи Опра Уинфрига берган интервьюси орқали, ўтган бир неча йил жуфтлик учун қанчалик оғир кечганидан хабар топиб, қайғуга тушди. Бу ҳақда Букингем саройи матбуот хизматига таяниб, «РБК» хабар берди.

Букингем саройи интервьюда Марклнинг ўғли Арчига ҳомиладор бўлганида, қироллик оиласининг баъзи аъзолари ҳали туғилмаган боланинг «танаси қанчалик даражада қора» бўлишидан хавотирлангани ҳақидаги гапларига жавоб қайтарди.

«Интерюда кўтарилган масалалар, айниқса, ирқий муаммолар бизни  ташвишга солмоқда. Баъзи хотиралар аслидан фарқ қилиши мумкин бўлса-да, улар жуда жиддий қабул қилинади ва уларни қироллик оиласи алоҳида кўриб чиқади», — дейилади баёнотда.

Букингем саройи, шунингдек, шаҳзода Гарри, Меган Маркл ва Арчи ҳар доим қироллик оиласининг севимли аъзолари бўлиб қолишини қўшимча қилди.

Американинг CBS телеканалида 7 март куни шаҳзода Гарри ва Меган Марклнинг интервьюси намойиш этилди. Қироллик ваколатларидан расман воз кечганига бир йил бўлган ушбу жуфтлик, интервью мобайнида бир қатор эътиборга молик баёнот ва бошқа масалалар қаторида Британия монархиясининг парда ортидаги ҳаётидан баъзи жиҳатларни очиб берган. The New York Times нашрининг ёзишича, эфирни бир вақтнинг ўзида камида 17,1 миллион киши томоша қилган.

Интервьюда Маркл биринчи фарзандига ҳомиладорлик вақтида ўғлига шаҳзода унвони берилмаслиги, шунинг учун у қироллик ҳимоясига олинмаслиги, шахсий тан соқчига эга бўлмаслигидан хабар топганини айтган. Шу билан бирга, герцогиня қирол оиласининг баъзи аъзолари ҳали туғилмаган боланинг «танаси қанчалик даражада қора» бўлишидан хавотирлангани маълум қилган.

Сассекс герцогиняси уларнинг исмларини тилга олмаган. Маркл акс ҳолда, бу қироллик оиласи вакилларига «жиддий зарар» етказишини таъкидлаган. Суҳбатдан сўнг, Уинфрининг маълум қилишича, кадр ортида шаҳзода Гарри ўғлининг танаси ранги мавзуси тўғридан-тўғри қиролича ёки унинг эри, шаҳзода Филипп томонидан муҳокама қилинмаганини таъкидлаган.

YouGov жамиятшунослик компаниясининг маълумотларига кўра, британияликларнинг 47 фоизи суҳбатни ноўрин деб топган, респондентларнинг 21 фоизи эса бунга аксинча ўз фикрини билдирган ва яна 31 фоизи интервью тўғрисида қарор қабул қила олмаган. Сўровда қатнашганларнинг 29 фоизи Сассекс герцоги ва герцогинясига, 39 фоизи қироллик оиласига ҳамдардлик билдирган.

Аввалроқ қиролича Елизавета II шаҳзода Гарри ва Марклнинг интервьюсига баҳо бериш учун унга бироз вақт кераклигини айтган эди.