Британия шаҳзодаси Гарри ва унинг рафиқаси Меган Маркл америкалик машҳур телебошловчи Опра Уинфрига интервью берди. Интервью Тошкент вақти билан 8 мартга ўтар кечаси Американинг CBS телеканалида, 9 мартга ўтар кечаси Британиянинг ITV телеканалида намойиш қилинди. Норасмий маълумотларга кўра, ушбу каналлар интервьюнинг трансляцияси ҳуқуқи учун камида 8,4 миллион доллар тўлаган. Аммо харажатлар ўрни аллақачон қопланган бўлиши мумкин, чунки трансляция АҚШда 17 миллион кишини, Буюк Британияда 12 миллион кишини экран қаршисига «михлаган».
Шаҳзода Гарри ва рафиқаси Марклнинг интервьюси шов-шувга айланиб, айни пайтда бутун дунёда муҳокама қилинмоқда. Meduza ушбу муҳокамаларнинг тафсилотларини тақдим этди.
Гарри ва Меган нималар ҳақида гапирган эди?
Шаҳзода Гарри ва Меган Маркл расмий тўй маросимидан уч кун олдин яширинча турмуш қурган. Қироллик оиласининг баъзи аъзолари жуфтликнинг биринчи фазанди Арчининг танаси қорамағиз бўлишидан хавотирланган (бу айнан ким эканлиги номаълум, аммо қиролича Елизавета II ёки унинг эри шаҳзода Филипп эмас). Болага шаҳзода унвони берилмаган. Британия ОАВ бу масалада изоҳ сўраб, Меганни таъқиб қилган, аммо қироллик оиласи уни жамоатчилик олдида тилини тийиб юришга мажбур қилган. Меган ўз жонига қасд қилиш ҳақидаги хаёлларгача борган.
Меган ва Гарри қироллик оиласидан ёрдам сўраганида, улар ёрдам бермаган. Жуфтликнинг қироллик ваколатларидан воз кечиши Гаррининг отаси шаҳзода Чарльз билан зиддиятга боришига ва акаси шаҳзода Уильямдан узоқлашишига сабаб бўлган. Қироллик оиласи Гарри ва Меганни молиявий таъминлашни тўхтатган, шунинг учун улар Netflix ва Spotify билан шартнома тузган. Уларнинг ёзда туғиладиган иккинчи фарзанди қиз бўлиши кутилмоқда.
Интервьюга жамоатчилик қандай муносаб билдирди?
Британиялик тарихчи Роберт Лэйси Гарри ва Меганнинг интервьюсини «бахтсиз оила ҳақида асл манбадан олинган ҳикоя» деб атади. Қироллик оиласи биографи Пенни Жунор интервьюни қўл гранатасига ўхшатди, BBC мухбири Жонни Даймонд эса уни Британия монархиясига пичоқ уришга қиёслади. CNN агентлиги 1995 йилда малика Диана шаҳзода Чарльз билан ажрашуви ҳақида айтган гапларидан бери қироллик оиласи энг жиддий инқирозга дуч келишини айтди. Монархияни тугатиш тарафдори бўлган Republic ҳаракати эса бу қирол Эдвард VIII 1936 йилда Уоллис Симпсонга уйланиш учун тахтдан воз кечганидан кейинги энг катта инқироз бўлади, деб ҳисобламоқда. Интервьюни ҳатто Россия Ташқи ишлар вазирлигининг расмий вакили Мария Захарова шарҳлаб, буни «саҳна безакларининг қулаб тушиши» деб атади.
Гарри ва Меган томонидан кўтарилган асосий муаммо Ғарб ОАВ томонидан ирқчилик деб ҳисобланмоқда. Британия нашрлари Арчининг танаси рангидан қироллик оиласи аъзоларининг қайси бири хавотирга тушганини очиқлашни талаб қилди ва оила аъзоларининг камлиги, демак гумонланувчилар ҳам унчалик кўп эмаслигини таъкидлади: Гаррининг отаси шаҳзода Чарльз ва унинг рафиқаси Камилла, шунингдек, Гаррининг акаси шаҳзода Уильям ва унинг рафиқаси Кейт Миддлтон. Шаҳзода Чарльзни аллақачон ирқчиликда гумон қилишди; унинг таржимаи ҳолини ёзувчи Жонатан Димблби эса бунга ишониш қийинлигини айтди.
Букингем саройи қандай муносабат билдирди?
Интервью эълон қилинганидан бир ярим кун ўтгач, Британия қироллик оиласи унга нисбатан баёнот эълон қилди. «Ўтган бир неча йил Гарри ва Меган учун қанчалик оғир кечганини эшитиб, бутун оила уларга ачинди. Кўтарилган муаммолар, айниқса, ирқий масалалар бизни ташвишга солмоқда. Баъзи хотиралар аслидан фарқ қилиши мумкин бўлса-да, улар ўта жиддий қабул қилинади ва уларни қироллик оиласи алоҳида кўриб чиқади», — дейилади баёнотда. Унда таъкидланишича, шаҳзода Гарри, унинг рафиқаси Меган ва уларнинг ўғли Арчи «ҳар доим қироллик оиласининг севимли аъзолари бўлиб қолади».
Daily Mail нашрининг ёзишича, саройдагилар интервьюдан «ҳафсаласи пир бўлган ва даҳшатга тушган», аммо муросали баёнот тайёрлаган. Бироқ қиролича уни имзолашдан олдин шаҳзода Чарльз ва шаҳзода Уильям билан биргаликда ўйлаб кўриш ва музокара олиб бориш учун бир оз вақт кераклигини айтган (уларнинг биринчиси умидсизликка тушган, иккинчиси жуда ғазабланган, деб ёзган The Sun). Буюк Британия бош вазири Борис Жонсон интервьюга изоҳ беришдан бош тортди.
Опра Уинфрининг ўзи қандай фикрда?
Опра Уинфри CBS телеканалидаги «This Morning» кўрсатувида интервьюдан олган таассуротлари билан бўлишди. Хусусан, телебошловчи нима учун Гарри ва Меган интервью беришга қарор қилгани ҳақида фирк билдирди: жуфтликнинг фикрича, қироллик оиласи доим улар ҳақида ёлғон хабар тарқатиб келган ва улар бундан чарчаган. Айни пайтда америкалик журналистлар Опрани профессионаллиги учун мақтамоқда.
Кимлар жуфтликнинг тарафини олди?
Шаҳзода Гаррига дўстона муносабатда бўладиган АҚШ президенти Жо Байден шахсий қийинчиликлар ҳақида очиқчасига гапириш учун Гарридаги сингари жасорат кераклигини таъкидлади. Собиқ давлат котиби ва АҚШ президентлигига собиқ номзод Ҳиллари Клинтон суҳбатни «юракни эзувчи» деб атади. Сассекс герцогинясининг дўсти, теннисчи Серена Уильямс «олди-қочди журналистика»ни қоралашга чақирди. Буюк Британиянинг Лейбористлар партияси депутати Кейт Грин ирқчилик айбловлари бўйича тергов ўтказилишини талаб қилди. Жо Байденнинг инаугурациясида сўзга чиққан америкалик шоира Аманда Горман, шунингдек, британиялик аёллар ҳуқуқлари фаоли Шола Мос-Шогбамима ҳам Меган Марклни қўллаб-қувватлади.
Интервью кимларнинг танқидига учради?
Меган Марклни анчадан бери танқид қилиб келаётган «Good Morning Britain» шоусининг бошловчиси Пирс Морган Марклнинг ҳатто об-ҳаво ҳақидаги сўзларига ҳам ишонмаслигини айтди. «Good Morning Britain»да интервью муҳокама қилинар экан, Морганнинг шериги унинг Меганга бўлган муносабатини «шайтонга хос» деб атаган пайт бошловчи ғазабланиб, студиядан чиқиб кетди. Daily Mail газетаси ўз муқовасидан «Улар нима қилиб қўйди?» сарлавҳаси остида Гарри ва Меганнинг фотосуратини чиқарди. Нашрда айтилишича, эр-хотиннинг бойлиги 45 миллион доллардан ошади ва уларнинг ўғли Арчига туғилган пайтида шаҳзода унвони берилмаган.
The Sun газетаси Меган ҳеч қачон Буюк Британияга қайтмаслиги мумкин деб ёзган ва «Megxile» ( инглизчада Meghan — Меган ва exile — сургун сўзларининг қисқартмаси) сўзини ишлатган. 400 дан ортиқ инглиз ОАВ ходимларини бирлаштирган Муҳаррирлар жамияти ОАВга нисбатан қўйилган герцогиняга тарафкашлик қилиш ҳақидаги айбловларни рад этди. Борис Жонсон ҳукумати вазири, Консерватив партия аъзоси Зак Голдсмит Гаррига «оиласини шарманда қилгани» учун танбеҳ берди ва «Меган ҳар доим хоҳлаган нарсасини олади», деб қўшимча қилди.
Аввалроқ Британия қироллик оиласининг хизматчилари шаҳзода Гаррининг рафиқаси Меган Марклни тазйиқ ўтказиш ва таҳқирлашда айблаган эди. Унга жавобан Маркл бундай «ҳужум»дан «хафа бўлганини» маълум қилган.
Изоҳ (0)