Россия ҳудудида 10 мартдан бошлаб Twitter’нинг ишлаш тезлиги пасайди, бунга тармоқнинг ўз таркибидан ноқонуний контентларни олиб ташламагани сабаб бўлмоқда, деб ёзади Meduza. Шунингдек, Россия ОАВни назорат қилувчи федерал хизмати («Роскомнадзор») агар Twitter мамлакат қонунчилигини эътиборсиз қолдиришда давом этса, Россияда тармоқнинг блокланишига рухсат беради.
«Россия фуқароларининг хавфсизлигини сақлаш ва интернет-сервисни Россия Федерацияси ҳудудида қонун ҳужжатларига амал қилишга мажбурлаш мақсадида Twitter’га нисбатан 2021 йил 10 мартдан бошлаб марказлаштирилган жавоб чоралари кўрилди, яъни ‘тартибга солиш қоидаларига мувофиқ’ тармоқ тезлиги пасайтирилади», — дейилади хабарда.
Тезликни пасайтириш мобил қурилмаларнинг 100 фоизида ва стационар қурилмаларнинг 50 фоизида амалга оширилади. Вазирликнинг қўшимча қилишича, агар Twitter Россия қонунчилиги талабларини эътиборсиз қолдиришда давом этса, у ҳолда «таъсир чораларининг давомийлиги блоклашгача боради».
«Роскомнадзор» хабарига кўра, 2017 йилдан буён ижтимоий тармоқда регуляторнинг талабига қарамасдан «вояга етмаганларни ўз жонига қасд қилишга ундовчи контент, таркибида болалар порнографияси, шунингдек, гиёҳванд моддаларни истеъмол қилиш тўғрисидаги маълумотлар» олиб ташланмаган. Шу вақт ичида «Роскомнадзор» Twitter’га 28 мингдан ортиқ шикоят юборган, аммо тақиқланган маълумотлардан иборат 3168 та материал ҳалигача ўчирилмаган.
Бунга энг сўнгги ёрқин мисол сифатида 2021 йил 3 мартда вояга етмаганларни оммавий ўз жонига қасд қилишга чақириқларини олиб ташлаш тўғрисидаги регуляторнинг талабларини бошқа ижтимоий тармоқлардан фарқли ўлароқ, Twitter намойишкорона равишда эътиборсиз қолдиргани кўрсатилмоқда.
5 март куни «Роскомнадзор» ўспиринларнинг ноқонуний хатти-ҳаракатларга алоқадор бўлган маълумотларни ўчирмагани учун бир нечта ижтимоий тармоқларга, шу жумладан, Twitter’га қарши протокол тузганини маълум қилган. Бундай таркибни олиб ташламаганлиги учун Одноклассники ижтимоий тармоғи тўрт миллион рубль (53 676 доллар), «ВКонтакте» эса бир ярим миллион рубль (20179 доллар) миқдорида жаримага тортилган.
Аввалроқ TikTok ўз жонига қасд қилишни тарғиб қилувчи видеороликларни блоклаётганини маълум қилган эди. 2 март куни Россиянинг бир қатор шаҳарларида, шу жумладан, Москвада мактаб маъмурияти ота-оналарга ижтимоий тармоқларда ўспиринларнинг ўз жонига қасд қилишига чақирувчи видеороликлар пайдо бўлаётгани тўғрисида огоҳлантирувчи хабарлар юборган. «Роскомнадзор» томонидан TikTok’да бундай видеороликларнинг тарқалгани тасдиқланди ва кузатувчи органларнинг аралашувидан сўнг ижтимоий тармоқ ушбу контентларни тармоқдан олиб ташлаган.
Изоҳ (0)