SpaceX kosmik kompaniyasi asoschisi va Tesla’ning bosh direktori Ilon Mask Forbes real vaqtda yangilanib boruvchi Real-Time ma’lumotlariga ko‘ra dunyoning eng boy odami maqomidan mahrum bo‘ldi.
Foto: AP Photo
Amerika fond birjalarida savdolar yakuniga ko‘ra Ilon Maskning boyligi 176,2 milliard dollarga baholandi, kun davomida u 13,5 milliard dollarga yoki 7,1 foizga kamaydi. Reytingda birinchi o‘rinni Amazon asoschisi Jeff Bezos egalladi. Uning boyligi 182,2 milliard dollarni tashkil etadi. Yil davomida u 3,6 milliard dollarga yoki 1,96 foizga kamaydi.
Mask 7-yanvar kuni Bezosni ortda qoldirib, dunyodagi eng boy biznesmenga aylangandi. O‘sha kuni uning boyligi 9 milliard dollarga o‘sib, 186,5 milliard dollarni tashkil etdi. Bloomberg Billionaires Index (BBI) ma’lumotlariga ko‘ra, 10-yanvar kuni Maskning boyligi 200 milliard dollardan oshdi. Hozirda BBI Maskning boyligini 194 milliard dollarga baholamoqda. Biznesmen hali ham eng boy odamlar ro‘yxatida birinchi o’rinni egallamoqda.
Mask dunyodagi eng boy odamlar ro‘yxatida Bezosni ortda qoldirgandan so‘ng, u o‘zining Twitter’dagi sahifasida mahkamlangan postni o‘zgartirib, 2018-yilda o‘z boyligining yarmini Marsda shahar qurishga yo‘naltirishga va’da bergan postini qayta joylagan. Maskning o‘zi Marsni mustamlaka qilish uchun barcha mol-mulkini sotishga qaror qilganini aytgan. “Aslida, menda kompaniyaning aksiyalaridan tashqari pul qiymatidagi mulkim deyarli qolmaydi”, — degan u. Avvalroq Mask 2050-yilga qadar Marsda 1 million aholisi bo‘lgan shahar qurishni rejalashtirganini aytgandi.
2020-yil boshlarida Maskning boyligi taxminan 27 milliard dollarga baholangandi. So‘nggi bir yil ichida biznesmenning boyligi keskin o‘sdi. O‘sishning asosiy qismi, 700 foizdan ko‘prog‘ini Tesla aksiyalari hisobiga bo‘lgan. 21-dekabr kuni u S&P 500 indeksiga kiritildi.
Bezos 2017-yildan beri sayyoradagi eng boy odam maqomini saqlab turdi. Forbes hisob-kitobiga ko‘ra, 2020-yilda u o‘z kapitalini 67,5 milliard dollarga ko‘paytirib,182 milliard dollarga yetkazdi.
