Франция ҳарбийлари мамлакат Қуролли кучлари тарихида биринчи марта 8 март, душанба куни коинотда ўқув машғулотларини бошлади. Бу ҳақда Франция ОАВга таяниб, «Интерфакс» хабар берди.
Ўқув машғулотлар 1965 йилда учирилган биринчи француз сунъий йўлдошига бағишланиб, АsterХ деб номланди. Машғулотлар пайтида ҳарбийлар ўта хавфли космик объект ва Франция сунъий йўлдошига нисбатан таҳдидларни кузатиб боради.
«Сценарий бўйича бир қатор воқеалар юз беради ва бизнинг космик инфратузилмамизга нисбатан инқирозли вазиятлар ва таҳдидлар пайдо бўлади, лекин бу ҳаммаси эмас» — дейди космик кучлар қўмондони Мишель Фридлинг Тулузадаги қўмондонлик штабида ўтказилган матбуот анжуманида. У машқларни «бизнинг (французларнинг) тизимларимиз учун стресс синови» деб атади ва улар «Франция армияси ва ҳатто Европа учун биринчи» эканини таъкидлади.
ОАВ хабарларига кўра, машғулотларда АҚШ космик кучлари ва Германия космик агентликлари ҳам иштирок этмоқда. Улар 12 март, жума кунигача давом этади.
Маълумот учун, Франция космик кучлари қўмондонлиги 2019 йилда ташкил этилган. 2019—2025 йилларда уни молиялаштиришни 5 миллиард долларга, ходимлар сонини эса 500 кишига етказиш режалаштирилган.
ОАВнинг қўшимча қилишича, аввалроқ Франция мудофаа вазири Флоранс Парли «бизнинг иттифоқчиларимиз ва рақибларимиз космосни ҳарбийлаштирмоқда ва биз ҳам ҳаракат қилишимиз керак», деб таъкидлаган эди. Унинг сўзларига кўра, Париж сунъий йўлдошга қарши лазер қуроллари ҳамда Россия, Хитой ва АҚШ билан технологик тафовутни камайтириш учун разведка воситаларини ишлаб чиқармоқчи.
Аввалроқ Қўшма Штатлар Россия ва Хитойнинг коинотдаги имкониятларидан хавотирда экани ҳақида хабар берилганди.
Шунингдек, АҚШ космик қўмондонлиги 2020 йил апрель ойида Россиянинг сунъий йўлдошга қарши ракетаси синовлари тўғрисида хабар берган. Ўша пайтда Пентагон ушбу қурол паст орбитада (сайёра юзасидан 1600-2000 км баланд) бўлган сунъий йўлдошларни уриб тушириши мумкинлигини аниқлаган.
Изоҳ (0)