Ilon Mask Bloomberg talqiniga ko‘ra dunyodagi eng badavlat odamga aylandi. Bu uning Tesla kompaniyasi aksiyalarining 7,9 foizga o‘sishi fonida yuz berdi, buning sharofati bilan tadbirkorning boyligi 194,8 milliard dollargacha o‘sdi — bu bir necha yillardan buyon birinchilikni egallab kelgan Amazon asoschisi Jeff Bezosning davlatidan 9,5 milliard dollarga ko‘p.

Foto: Reuters

Agentlik qayd etishicha, shu paytgacha hech kim bunchalik tez boyimagan edi — bir yil ichida Tesla rahbarining boyligi 165 milliard dollarga ko‘paygan. Taqqoslash uchun, bu Bill Geytsning umumiy boyligi miqdoriga teng. Mask Tesla aksiyalarining keskin o‘sib borishi fonida boyimoqda, 2020-yildagi o‘sish 743 foizga teng bo‘ldi.

Shu bilan birga, Bloomberg e’tibor qaratishicha, Tesla 775 milliard dollarga (Facebook’dan qimmatroq) baholanmoqda, ammo bor-yo‘g‘i 500 mingga yaqin avtomobil ishlab chiqaradi — bu Ford va General Motors hajmlaridan ancha kam.

Shuningdek, agentlik qayd etishicha, Mask kapitalining katta qismi uning kompaniyasi kapitali bilan bog‘liq. Tadbirkorning o‘zi ham uni pullar kam qiziqtirishini ko‘p bora aytib o‘tgan va hatto barcha boyligidan xalos bo‘lishga ham va’da bergan edi. Dunyodagi eng boy odam deb tan olinganini bilganidan keyin Tesla rahbari Twitter’da “Juda g‘alati” va “Ok, ishga qaytamiz” deb post qoldirgan.

Forbes Bloomberg’ning hisob-kitoblariga qo‘shilmaydi, unga ko‘ra, Maskning kapitali 175,2 milliard dollarga teng. Bu uning sayyorada badavlatlikda uchinchi o‘rinda turuvchi fransiyalik magnat Bernar Arnodan 22 milliard dollarga boyroq, ammo Bezosdan 11 milliard dollarga kambag‘alroq ekanligini anglatadi. Forbes hisob-kitoblariga ko‘ra, Bezosning boyligi 186,8 milliard dollarni tashkil etadi.