Шимолий яримшарда 2100 йилга келиб ёзнинг давомийлиги олти ойга чўзилиши, қиш эса икки ойдан кам давом этиши мумкин. Бу ҳақда American Geophysical Union томонидан чоп этилган хитойлик олимларнинг тадқиқот натижаларига таяниб, «РБК» хабар берди.
«Глобал исиш туфайли ёз фасли борган сари иссиқроқ бўлиб, узоқроқ давом этмоқда. Қиш эса қисқа ва илиқроқ бўлиб бормоқда» — дейди тадқиқот муаллифларидан бири, океанограф Юпин Гуанг.
Олимлар 1952 йилдан 2011 йилгача бўлган иқлим маълумотларини ўрганиб чиқди ва ёз 78 кундан 95 кунгача узайгани, қиш эса 76 кундан 73 кунгача қисқарганини аниқлади. Баҳор ва кузнинг давомийлиги ҳам мос равишда, 124 кундан 115 кунгача ва 87 кундан 82 кунгача камайган.
«Шунга кўра, баҳор ва ёз эрта, куз ва қиш эса кечроқ келишни бошлаган. Мавсумий циклларидаги энг катта ўзгаришларни Ўрта Ер денгизи минтақаси ва Тибет платоси бошдан кечирди», — дейилади тадқиқотда.
«Иқлим ўзгариши асоратларсиз кечмайди, у қишлоқ хўжалиги, инсон саломатлиги ва атроф-муҳитга таъсир қилади», — дея огоҳлантиради тадқиқот муаллифлари.
Россиянинг Aтмосфера физикаси институти илмий раҳбари Игор Мохов ҳам ўз навбатида глобал исиш натижасида иқлим даври ўзгариши кутилаётганини, бу жараён узоқ вақтдан бери давом этаётганини айтган. «Иқлим ўзгариши эндиликда янада яққолроқ ва кучлироқ намоён бўлмоқда», — деди у.
Моховнинг таъкидлашича, иқлим ўзгариши билан шимолдан, Арктика кенгликларидан совуқ ҳавонинг кириб келиши эҳтимоли ортади ҳамда ижобий ва салбий ҳарорат аномалиялари галма-гал кузатилади.
Олимлар 2021 йил ўтган йилга қараганда совуқроқ бўлишини кутмоқда, бу «азалий анъана» фонидаги аномалиядан дарак беради.
Аввалроқ олимлар океанларда сув сатҳи кутилганидан анча тез кўтарилаётганини маълум қилган эди. Шунингдек, иқлим ўзгариши туфайли Атлантика океанидаги илиқ денгиз оқими тезлигининг рекорд даражада пасайгани ҳақида ҳам хабар берилган.
Изоҳ (0)