Контрабандага қарши курашиш ва божхона аудити бош бошқармаси таркибида ташкил этилган махсус таркибий тузилма — ситуацион марказнинг очилиш маросими 3 март куни бўлиб ўтди, деб хабар бермоқда «Gazeta.uz» Давлат божхона қўмитаси матбуот хизматига таяниб. Ушбу бошқарма 2020 йилнинг ёзида Президент фармони билан ташкил этилган эди.
Биринчи шундай ситуацион марказ Япония ҳукумати кўмагида БМТнинг Гиёҳванд моддалар ва жиноятчилик бўйича бошқармаси (UNODC)нинг Марказий Осиё бўйича минтақавий ваколатхонаси билан ҳамкорликда ташкил этилди.
Ушбу махсус марказ хорижий давлатлар божхона хизматларининг илғор тажрибаларига асосланган замонавий ахборот технологиялари ва имкониятлардан, шунингдек, таҳлил усулларидан фойдаланган ҳолда реал вақт режимида божхона объектларини кенг миқёсда масофадан туриб бошқаришни амалга ошириши таъкидланган.
UNODC вакилларининг маълум қилишича, ситуацион марказ автомобиль ва темир йўл назорат пунктлари, шунингдек, аэропортлардаги назорат пунктлари ишини мониторинг қилиш соҳасида идоралараро мувофиқлаштиришни кучайтиради. Шунингдек, ҳуқуқни муҳофаза қилиш органлари тезкор бўлинмаларининг таҳлилий салоҳиятини оширишга ёрдам беради.
Шунингдек, маълумотларни марказлаштирилган тарзда йиғиш, қайта ишлаш ва таҳлил қилишни, гиёҳванд моддалар савдоси, трансчегаравий жиноятлар, контрабанда ва божхона қоидаларини бузиш билан курашиш соҳасида бошқа мамлакатлар билан ахборот алмашинувида ҳамкорлик қилишни енгиллаштиришга ёрдам беради.
Марказ миллий, ҳам минтақавий, ҳам халқаро даражадаги турли хил ҳуқуқни муҳофаза қилиш идоралари ҳамкорлигидаги операцияларни тезкор мувофиқлаштириш маркази вазифасини бажаради.
Изоҳ (0)