O‘zbekistonda kripto-birjalar faoliyatini amalga oshirish uchun birinchi litsenziya Koreyaning Kobea Group kompaniyasiga berildi. Bu haqda O‘zbekiston Prezidenti huzuridagi Loyiha boshqaruvi milliy agentligi xabar berdi.
Qayd etilishicha, litsenziya O‘zbekiston Prezidentining 2018-yil 2-sentabrda qabul qilingan “O‘zbekiston Respublikasida kripto-birjalar faoliyatini tashkil etish chora-tadbirlari to‘g‘risida”gi qaroriga muvofiq berilgan.
Ma’lumot uchun, Kobea Group raqamli iqtisodiyotda turli yechimlarni, shu jumladan, blokcheyn texnologiyasini ishlab chiqishga ixtisoslashgan texnologik kompaniyadir.
Kompaniya kripto-aktivlar aylanmasi sohasidagi O‘zbekiston milliy qonunchiligining barcha talablariga, shuningdek, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish sohasidagi xalqaro standartlarga (FATF tavsiyalari va rahbarlik hujjatlariga) muvofiq ravishda kripto-birja faoliyati bilan shug‘ullanish niyatida.
