Олег Мальгинов Россиянинг Ўзбекистондаги элчиси этиб тайинланди. Бу ҳақдаги Россия президенти Владимир Путиннинг фармони ҳуқуқий маълумотлар расмий порталида эълон қилинди.
Олег Мальгинов Россиянинг Ўзбекистондаги дипломатик ваколатхонасига 2009 йилдан бери раҳбарлик қилиб келган Владимир Тюрденев ўрнини эгаллайди.
Олег Мальгинов 1957 йилда туғилган. У СССР Ташқи ишлар вазирлиги қошидаги Москва давлат халқаро муносабатлар институтини тамомлаган. У 2012 йилдан 2016 йилгача Россиянинг Руминиядаги элчиси бўлган.
Ушбу лавозимга тайинланишидан олдин Мальгинов Россия Ташқи ишлар вазирлигининг Чет элдаги ватандошлар билан ишлаш департаменти директори лавозимида ишлаган.
Бундан аввал Ўзбекистон соғлиқни сақлаш вазири «Роспотребнадзор» раҳбарига «Меҳр-саховат» кўкрак нишонини топширгани, Ўзбекистон ва Россия ТИВ раҳбарлари Шавкат Мирзиёевнинг Москвага кутилаётган ташрифига тайёргарликни муҳокама қилгани ҳамда Россия ташқи ишлар вазири «Спутник V» вакцинаси Ўзбекистонда рўйхатга олинганини айтгани ҳақида хабар қилинганди.
Изоҳ (0)