Ўзбекистон соғлиқни сақлаш вазири Абдуҳаким Ҳожибоев Москвада Россия Истеъмолчилар ҳуқуқларини ҳимоя қилиш ва инсон фаровонлигини назорат қилиш федерал хизмати («Роспотребнадзор») раҳбари Анна Поповага «Меҳр-саховат» кўкрак нишонини топширди, деб хабар бермоқда «Дунё» ахборот агентлиги.
Ўзбекистоннинг Россиядаги элчихонаси маълум қилишича, маросим чоғида «Роспотребнадзор» раҳбари Президент Шавкат Мирзиёевга мукофот учун миннатдорлик билдирган.
Маълумот учун, пандемия пайтида бир гуруҳ россиялик етакчи мутахассислар ўзбекистонлик ҳамкасбларига услубий ва амалий ёрдам кўрсатиш учун Ўзбекистонга юборилган. «Роспотребнадзор», шунингдек, Ўзбекистонга 140 минг дона тест тўпламини юборди.
Эслатиб ўтамиз, Ўзбекистон Президентининг 2020 йил 26 майдаги фармонига мувофиқ, коронавирус пандемияси даврида, шунингдек, турли табиий офатларга қарши курашишда, уларнинг оқибатларини бартараф этишда мардлик ва жасорат намунасини кўрсатган, аҳолининг ижтимоий ҳимояга муҳтож қатламларини ҳар томонлама қўллаб-қувватлашга катта ҳисса қўшган, жамиятда тинчлик-осойишталикни мустаҳкамлашда фаол иштирок этишда ўрнак бўлаётган фуқароларни тақдирлаш мақсадида «Меҳр-саховат» кўкрак нишони таъсис этилган.
Бундан аввал «Роспотребнадзор» Ўзбекистонда тарқалган коронавирус штаммининг ўзгаришини ўрганиши, «Роспотребнадзор» раҳбари баҳорда COVID-19 пандемияси тугашини тахмин қилгани ҳамда «Роспотребнадзор» коронавирус билан касалланган одам қачон максимал даражада юқумли бўлишини маълум қилгани ҳақида хабар берилганди.
Изоҳ (0)