Ахборот технологиялари ва коммуникацияларини ривожлантириш вазирлиги кўмагида Тошкент шаҳридаги Амити университети ётоқхонаси очилди, деб хабар берди «Xabar.uz».
Маълум қилинишича, ётоқхонадаги хоналар барча керакли жиҳозлар, кир ювиш машиналари, овқат тайёрлаш учун шароитлар, телевизор ва бошқа қулайликлар билан таъминланган бўлиб, талабалар бўш вақтларини фойдали ўтказишлари ва ҳордиқ чиқаришлари учун барча шароитлар яратилган.
«Энг асосийси, ётоқхона ўқув биноси ёнида жойлашган бўлиб, бу талабаларга янада кўпроқ қулайликни кафолатлайди.Махсус турар жой 182 нафар ўқувчи учун хизмат кўрсатиб, 47 таси қизлар, 130 таси эса йигитларга ажратилган. Бундан ташқари, 5 нафар ногирон талабага ҳам жой ажратилган», — дейилади хабарда.
Маълумот учун, 2019 йилда АТК вазирлиги ҳамда Ҳиндистоннинг Амити университети ҳамкорлигида Тошкент шаҳрида Амити университети ташкил этилганди. Олий таълим муассасаси ахборот-коммуникация технологиялари, жумладан, компьютер ва дастурий инжиниринг, сунъий интеллект ва менежмент соҳаларида мутахассислар тайёрлайди.
Аввалроқ Тошкент шаҳридаги Инҳа университетининг 200 ўринга мўлжалланган биринчи ётоқхонаси фойдаланишга топширилгани тўғрисида хабар берилганди.
Эслатиб ўтамиз, февраль охирда Тошкентнинг Юнусобод туманида беш нафар талаба ўлик ҳолда топилгани, улардан бири Инҳа университетининг 1-босқич талабаси эканлиги тўғрисида хабар берилган эди. Фожиадан сўнг ижарада яшаётган талабаларнинг шароитлари ўрганиладиган бўлди.
Изоҳ (0)