Олмалиқ шаҳар ҳокимлиги ижтимоий тармоқларда шаҳарнинг 5/2 даҳасида 7 ёшли қизчани ўғирлаб кетишга уринишда гумонланган фуқаро билан боғлиқ ҳолат тасвирланган видеога муносабат билдирди.
Қайд этилишича, 2021 йил 2 март куни 1961 йилда туғилган М.Қ. исмли фуқаро укасининг «Тошкент» маҳалласидаги хонадонларнинг бирида туғилган кунини нишонлаш учун бориб, у ерда спиртли ичимлик истеъмол қилган. Соат 19:00 ларда М.Қ. уйига қайтиб келаётган вақт ошқозони қаттиқ оғригани учун «Янги ҳаёт» маҳалласи, 27-уй йўлагига кириб, зинада ўтириб қолган.
Шу вақт 27-уйдаги хонадонда яшовчи, вояга етмаган, 2014 йилда туғилган қизча дўкондан туз олиб келаётганлиги ва уй йўлагида ўтирган нотаниш шахсни кўриб, қўрққани сабабли, ичкарига кира олмасдан турганида, унинг дадаси келиб қолган. Қизнинг дадаси бу ҳолатни нотўғри тушунган ва ўша жойдаёқ шаҳар ИИБга мурожаат қилган. Ушбу ҳолатни оиланинг қўшниси Ж.М. видеога олган.
Шундан сўнг, содир бўлган воқеадан бехабар Д.А. таниши Ж.М.нинг телефонидаги видеотасвирни ўз телефонига кўчириб олиб, М.Қ. ёш болаларни ўғирлаш билан шуғулланиб келаётгани ҳақида шарҳ билан Telegram ижтимоий тармоғи орқали тарқатиб юборган.
Фуқаро М.Қ. томонидан вояга етмаган қизга тегмаган, унга тан жароҳати етказмаган ва уятсиз-бузуқ ҳаракатлар содир этмаган. Мазкур ҳолат бўйича ҳозирда Олмалиқ шаҳар ИИБ томонидан терговга қадар текширув ўтказилмоқда.
Аввалроқ Тошкентда лифтда вояга етмаган қизларга тегажоғлик қилган эркак 1,5 йилга қамалгани тўғрисида хабар берилганди.
Изоҳ (0)