Тошкент вилояти Зангиота тумани «Ёшлар — келажагимиз» жамғармаси собиқ бош ҳисобчиси катта миқдорда пул маблағларини ўзлаштиргани аниқланди, дея хабар бермоқда вилоят прокуратураси.
Қайд этилишича, Зангиота тумани «Ёшлар — келажагимиз» жамғармаси собиқ бош ҳисобчиси А.У. ўзининг таъсисчилигидаги оилавий корхонасига турмуш ўртоғини раҳбар этиб тайинлаб, «Ёшлар — келажагимиз» туман жамғармаси раҳбари ва «Халқ банки» Зангиота филиали мансабдор шахслари билан ўзаро олдиндан жиноий тил бириктирган.
Собиқ ҳисобчи 1 дона Isuzu, 1 дона Damas автомашинасини олиш учун 320 миллион сўм ҳамда 1 дона Damas ва қолипли нон пишириш печкаларини сотиб олиш учун 80 миллион сўм, жами 400 миллион сўм имтиёзли кредит маблағларини олишга эришиб, 11 нафар ёшни иш билан таъминламасдан, кредит маблағларини талон-торож қилган.
Бундан ташқари, туман «Ёшлар — келажагимиз» жамғармаси раҳбари А.Т. танишлари номига оилавий корхоналар ташкил қилиб, уларнинг ҳар бирига паррандачилик учун 20 миллион сўмдан кредит маблағлари ажратилишига эришиб, гўёки товуқлар ўлганлигини рўкач қилиб, кредит маблағларини ўзлаштиргани аниқланган.
Бундан аввал Марғилонда 1,4 миллиард сўм миқдорида солиқ тўловларини тўламаган корхона раҳбарига жиноят иши очилгани, Наманганда «Ҳар бир оила — тадбиркор» дастури доирасида 155 миллион сўмлик кредит маблағларини талон-торож қилган тадбиркорга жиноят иши қўзғатилгани ҳамда Наманганда 25 нафар фуқарога ажратилган 669,4 миллион сўмни тадбиркор ва банк ходимлари талон-торож қилгани аниқлангани ҳақида хабар берилганди.
Изоҳ (0)