Ўзбекистон аҳолисининг даромади 2020 йилда кескин камайган – Марказий банк

Ўзбекистон Марказий банки 2020 йилнинг IV чораги бўйича Аҳолининг истеъмол кайфияти шарҳини эълон қилди.

Марказий банк томонидан аҳолининг даромадлари ва харажатлари таркиби, уларнинг истеъмол ва жамғариш кайфияти ҳамда кредитга бўлган талаби, шунингдек, инфляциянинг аҳолининг турли даромадга эга қатламларига таъсирларини ўрганиш бўйича республиканинг барча ҳудудларида сўровлар ўтказилган. Сўровда 2020 йил IV чорагида кузатилган тенденциялар бўйича саволларга берилган жавобларини таҳлил қилиш орқали аҳолининг фикр-мулоҳазалари ва кутилмаларига баҳо берилган.

Респондентларнинг 70 фоизи 2020 йилда ўз даромадларининг кескин камайганини таъкидлаган бўлса, фақатгина 15 фоизи даромадларининг ошганлигини маълум қилган. Бунда, ўтган даврдаги иқтисодий ҳолатнинг ёмонлашиши асосан респондентларнинг кам даромадли қисмига сезиларли даражада салбий таъсир кўрсатган.

65 фоиз респондентлар келгуси 12 ой давомида даромадлари ошишини маълум қилган. Даромадлари ўзгаришсиз қолиши ёки камайишини кутаётган аҳоли вакиллари умумий респондентларнинг 20 фоизига тенг бўлди.

37,4 фоиз респондентлар жамғармаси йўқлигини маълум қилган бўлса, 23,6 фоиз респондент агар даромад олиш манбаларида узилиш бўлган тақдирда жамғармалар «ўртача 1 ойгача етади» деб жавоб берган. 21,7 фоиз респондентлар эса 1−3 ойгача, 9 фоизи 3−6 ойгача етади, деб жавоб берган.

Марказий банк шарҳига кўра, ўтган 12 ой давомида оилавий даромади 3 миллион сўмгача бўлган респондентлар томонидан «даромадлар кескин камайди» ва «бироз камайди» деган жавоблар улуши бошқа даромадли гуруҳларникидан сезиларли даражада юқорини ташкил этган.

Эслатиб ўтамиз, Президент Шавкат Мирзиёев 29 декабрь куни Олий Мажлисга йўллаган Мурожаатномасида 2021 йилда нарх-наво ўсишини 10 фоиздан оширмаслик Марказий банк ва ҳукуматнинг асосий вазифаси бўлишини айтганди. Февраль ойида мамлакатда инфляция даражаси 0,6 фоизни ташкил этган.